طفل صغير

طفل صغير وحاضن كورته بايديه
ع الكرسى قاعد ومش طايله الارض رجليه
موطى راسه وحزين معرفش ليه
يمكن قالوله بطل كدا تنطيط ولعب
يمكن وعدوه والوعد طلع كدب
يمكن عايز يكبر ويكبر
نفسه يبطل يقف ويشب
احلامه كبيره وف خياله حققها
حواديته كتير ومين يسمع ويصدقها
اينعم دنيته على اد كف ايديه
بس اه لو شافوا الناس الدنيا بعينيه
ح يلاقوها مرجيحه وكراسة تلوين
ح يلاقوها من غير كدب ولاغش ولا تلوين
ح يلاقوها كف صغير بيدعى يقول امين
عايز كل حاجه حلوه لنفسه وللبنى ءادمين
قوم يا صغير ولا يهمك
دول ناس معقدين
قوم واتنطط والعب بالكوره شمال ويمين
ومعلش مهما كان زعلك منهم
برضه انت بالنسبه لهم نور العين