ولا عارف

ولا عارف انا عنك ابعد
ولا عارف ارجعلك
ياما كنت معايا بتعند
وانا بسكت واسمعلك
قولت هتعرف قمية صبرى عليك
بس انت معرفتهاش
ولما ف يوم يزيد شوقى اليك
قلبى يقولى ما تنساش
انه جرحك..واستغنى عنك
وكلمة اسف مش منه تيجى منك
دى ساعتها انا مستحملهاش
ايوه انا ببعد غصب عنى
وانت السبب لكنى
لسه عايش كأنى معاك
بشوفك وانت مش شايفنى
صعب عليا ما انت عارفنى
سر حياتى لحظة ما بلقاك

سألونى مالك

سألونى مالك؟
قولت بتسألوا ليه
قالوا صعبان علينا اللى انت فيه
قولت هو انا بجد باين عليا؟
قالوا اللى يعيش ف الحزن يبان عليه
وعرفت انى بضحك وف العين دموع
اتكلم وانا من قلبى موجوع
عايش فى خوف على ضوء شموع
قافل على نفسى الباب
مفتوح عليا وانا مخدوع
واستغرب عرفوا منين؟
كنت فاكر هتدارى العين
بس الجرح عايزله سنين
عشان يادوب بس انساه
عشان بس اعيش الحياه
يبقى كدا ايه عمرى؟
كدا وصل لمنتهاه؟
دا حتى مبقتش احس
مبقتش اقول الأه
من كتر الألم سكت
احساسى راح او يمكن تاه
يمكن هيرجعلى
ويمكن هتوه معاه

ياترى

ليله بس...شوف حالى..شوفنى ازاى بحب فيك
ليله حس..بيا ياغالى...لما تيجى فى خيالى عينيك
وبلاقى صعب انه يوصل
دا حتى مستحيل يحصل
ياترى ييجى يوم وتعرف حبيبى...باللى بحس بيه
ياترى يومها يقدر كلامى..يوصف اللى انا فيه

حاول تصدق

ساعة لقانا جيت اقابله..مشتاق اشوفه قصادى
بس غريبه عمر ما غابله...ولو ثانيه عن ميعادى
انا عارف انه جاى...بس هييجى ازاى..وانا ولا مره شوفته من زمان
اه يا قلبى خلاص...مش قادر خلاص
حاول تصدق..دور حواليك هو فين
على اى اساس...لسه فيه احساس
حد يعيش كدا ف الوهم سنين؟

شوفتك فرحان

شوفتك فرحان...مع غيرى فرحان م القلب
حاسس بحنان...وعيونك مليانه حب
وخلاص هتيجى عينيك فى عينيا
هربت عشان ما تشوفنيش
خوفت منك تزعل عليا
وانت شايفنى مش قادر اعيش
وسألنى قلبى اشمعنى هو قادر يحب تانى
حبه ليك دا مكنش حب
قولتله صدقنى دا مش قادر ينسانى
واللى فيه دا كله كدب

فكر بقلبك

بقى بعد ما اقابلك..من سنين
عيشتها مشتقالك..كلى حنين
عايز تبعد من تانى
مارقش قلبك علشانى؟
وانا بالدمع بنادى عليك
انا بعدك هضيع تانى
دا انا ابقى كدا بظلم روحى...لو سبتك تعمل كدا فيا
دا انا روحك وانت روحى...فكر بقلبك يا حبيبى شويه

ضحكتلى ايامى

نفسى اقابل عينيك...واشوفهم تانى ادامى
ما انا بفكر فيك..ولسه بتيجى ف احلامى
ما انت لسه حبيبى..ما انت كل غرامى
ما انت وانت معايا...ضحكتلى ايامى
كنت زمان بعيش..بتمنى تحس هوايا
ولسه حبيبى مفيش...شىء اتغير جوايا
ما انت لسه حبيبى..ما انت كل غرامى
ما انت وانت معايا...ضحكتلى ايامى
لو اشوفك تانى اكيد...ح اقولك كلمه على بالى
شايلهالك وانت بعيد...مستنى اقولها ياغالى
ما انت لسه حبيبى..ما انت كل غرامى
ما انت وانت معايا...ضحكتلى ايامى

دا بيكدب

جانى يقول اسمعنى
وقعد يقول ويعيد
بيقول انا عايز فرصه
ح اتغير وابقى جديد
دا بيكدب تانى عليا...باينه ماحرمش اكيد
يحلف وعينيه فى عينيا...وبيص بسرعه بعيد
ياما جالى يقولى ياروحى
والله حياتى معاك
زود فيا جروحى
وبيعمل فيها ملاك
دا بيكدب تانى عليا...باينه ماحرمش اكيد
يحلف وعينيه فى عينيا...وبيص بسرعه بعيد
علشانه كدبت عينيا
سيبته يخونى ويجرحنى
دلوقت مفيش حنيه
قلبى بنسيانه سمحلى
دا بيكدب تانى عليا...باينه ماحرمش اكيد
يحلف وعينيه فى عينيا...وبيص بسرعه بعيد

هما يومين ويعدوا

هما يومين ويعدوا حبيبى...هما يومين وانساك
ح انسى سنين من عمرى حبيبى...عاشهم قلبى معاك
هارجع اعيش لياليا
اكتب اسمى بايديا
اول سطر فى كتاب العاشقين
وييجوا الناس اعلمهم
كلام الحب لحبايبهم
واجيب لحبيبتى القمر على تاج ياسمين
اوعى تلومنى فى يوم يا حبيبى...وتقول انك مظلوم
شوف مين جرح التانى حبيبى...ومادوقنيش النوم
هارجع اعيش لياليا
اكتب اسمى بايديا
اول سطر فى كتاب العاشقين
وييجوا الناس اعلمهم
كلام الحب لحبايبهم
واجيب لحبيبتى القمر على تاج ياسمين

كان نفسى

كان نفسى اعيش وياك...وانا ايدى فى ايديك..شايف صورتى فى عينيك
واكونلك اعز حبيب
نصيبى ماكونش معاك...وكل ماهتبعد يوم...قلبى هيزيد اللوم
وح تفضل برضه قريب
كنت بشوفك اوعد نفسى واوعدك...ما تكونش لحد غيرى
فضلت تبعدنى الظروف وتبعدك...واخدك منى غيرى
بيصعب عليا القاك...واشوفك مش ليا..مالى عليا لياليا
واعيش من غير حنانك
واهرب ساعة لقاك...علشان زعلك جارحنى...وياريت فعلا تسامحنى
وياريت سهل نسيانك
كنت بشوفك اوعد نفسى واوعدك...ما تكونش لحد غيرى
فضلت تبعدنى الظروف وتبعدك...واخدك منى غيرى

دا اللى قدرت عليه

بشوفها كل ليله ويوم
قمر بين سحاب ونجوم
وبدارى الحب ف كلامى
وارجع اسأل نفسى ليه
دا اللى قدرت عليه...ف سكوت اعشق واتمنى...واعيش ف خيالى الجنه...والحب اسهر لياليه
دا اللى قدرت عليه...يادوب ارد السلام...وانسى اى كلام...سهرت افكر فيه
وهى ح تعرف بس منين
مش ح يبان جوا العين
لازم كلمة حب تريح
لازم شوقى تحس بيه
دا اللى قدرت عليه...ف سكوت اعشق واتمنى...واعيش ف خيالى الجنه...والحب اسهر لياليه
دا اللى قدرت عليه...يادوب ارد السلام...وانسى اى كلام...سهرت افكر فيه

رباعيات ياقلبى

كل رباعيه هى حاله فى حد ذاتها...ساعات اللى بيكتبها...بيعبر عن حالات غيره...وف نفس الوقت بيكون حاطط فيها لغز...ماحدش يحله...غيره هو
فين ياقلبى نبضك واحساسك
فين راح شوقك لاغلى ناسك
ياترجع قلبى ياقلبى
ياادوق السم من نفس كاسك
وعجبى
سكاتك ياقلبى دا مالوش اسباب
جرحك ماهوش اول ولا اخر عذاب
كلامك مش راح يكون دوا ولكن
سكوتك مش ح يرجع الاحباب
وعجبى
ياقلبى يا انيسى الوحيد
جوا بير مظلم بعيد
خلتنى مش يائس وعايش
مع كل دقه امل جديد
وعجبى

الاسود والكلاب

لا تأسفن على غدر الزمان لطالما.....رقصت على جثث الأسود كلابا
لا تحسبن برقصها تعلو على أسيادها.....تبقى الأسود أسودا وتبقى الكلاب كلابا

واحشانى

الحب فى اوله بخيالاته واحلامه...له جو خاص وعالم بيتكون...كله عشق وحب
واحشانى يا صوره رسمتها لنفسى وحبيتها
واحشانى ياللى اخترتها وجوا قلبى خبيتها
كلمتك عينيكى
وخلص الكلام فى لمح البصر
حقيقى عيونك حلوين والاحلى
انى شوفت فيهم احلى قدر
معرفتش امتى وصل لقلبى الخبر
ولا يوم ابدا على قلبى خطر
وحشانى ياصوره سهران معاها والشوق يتمادى
وكل مايقرب ميعادك يدق قلبى دقه زياده
نفسى ياادخلك صورتك يا تخرجيلى
نفسى احسك جنبى...اسمعك تندهيلى
عمر الليالى ما ح تمل العشق فيكى
لكن مناها تضمنا ياحبيبتى وكفايه عليها تميلى

عرفت الهوى

حاولت اكتب دعاء زى ما كتبت السنه اللى فاتت ف نفس التوقيت دا...لكن فوجئت بالقصيده دى لرابعه العدويه فى حب الله-عز وجل
عرفت الهوى مذ عرفت هواك
وأغلقت قلبي عمن عداك
وقمت أناجيك يا من ترى
خفايا القلوب ولسنا نراك
أحبك حبين .. حب الهوى
وحبا لأنك أهل لذاك
فأما الذي هو حب الهوى
فشغلني بذكراك عمن سواك
وأما الذي أنت أهل له
فكشفك لي الحجب حتى أراك
فلا الحمد في ذا ولا ذاك لي
ولكن الحمد في ذا وذاك
أحبك حبين.. حب الهوى
وحبا لأن أهل لذاك
واشتاق شوقين ..شوق النوى
وشوق لقرب الخلي من حماك
فأما الذي هو شوق النوى
فمسرى الدموع لطول نواك
أما اشتياق لقرب الحمى
فنار حياة خبت في ضياك
ولست على الشجو أشكو الهوى
رضيت بما شئت لي في هداكا

مذاكره رايح جاى

أنشاء الله اشوفكم على بدايه شهر رمضان

أدعوكم لزياره مدونتنا الجديد عن النادى الاهلى بطل القرن

التى اشتركت فيها ومعى محمد(wa3d_el3yoon)ورضوى(دودى)

http://100el-ahly.blogspot.com/

عيد ميلاد سعيد

الناهرده عيد ميلاد اغلى الناس...ملاك فى صورة بشر
كل سنه وانتى طيبه يانور
وعقبال ميت سنه واكون معاكى واقولهالك برضه...انا لسه فاكر اول عيد ميلاد كنت بقولك فيه كل سنه وانتى طيبه...وكنت بحاول كل سنه اكون اول واحد يوقلهالك ف اليوم دا بس المره دى معرفتش...
.والسنه دى بقولها وبنفس الشعور برضه من تلات سنه... بس يمكن انتى المره دى وحشانى اكتر من اى مره...كان نفسى اكتب حاجه المره دى بس انتى عارفه الظروف بقى...:))
كل سنه وانتى طيبه يانور القمر

رباعيات:الالم

الالم سواء نفسى او عضوى...اسمه برضه الم...ولو كان الالم رجلا لقتلته
الألم زى الذنب ما يتحملوش اتنين

اشكى ح يسمعوك لكن ح يحس مين

وحدك انت بتتألم وتتوجع

واهاتك بس هما اللى بيك حاسين

وعجبى

فيه الم يجعل م القط وحش مخيف

والم يجعل م الخسيس الواطى شريف

ألمى انا خلانى احس بالناس

واحس بالقوى لما يكون ضعيف

وعجبى

ملعون ابو خاش الايه والاه

ملعون ابو اللى ماشى فاردلى قفاه

ملعون ابو عجل معاه فلوس

ملعون ابو اللى يبيع الموت على انه حياه

وعجبى

remember me

song by:josh groban
from the film:troy

Remember, I will still be here

As long as you hold me, in your memory

Remember, when your dreams have ended

Time can be transcended

Just remember me

I am the one star that keeps burning, so brightly,

It is the last light, to fade into the rising sun

I'm with you..Whenever you tell, my story,

For I am all I've done

Remember, I will still be here

As long as you hold me, in your memory

Remember me

I am the one voice in the cold wind, that whispers

And if you listen, you'll hear me call across the sky

As long as I still can reach out, and touch you

Then I will never die

Remember, I'll never leave youIf you will only

Remember me

Remember me...

Remember, I will still be here

As long as you hold meIn your memory

Remember, when your dreams have ended

Time can be transcended I`ll live forever

Remember me

Remember me

Remember... me...

طفل صغير

طفل صغير وحاضن كورته بايديه
ع الكرسى قاعد ومش طايله الارض رجليه
موطى راسه وحزين معرفش ليه
يمكن قالوله بطل كدا تنطيط ولعب
يمكن وعدوه والوعد طلع كدب
يمكن عايز يكبر ويكبر
نفسه يبطل يقف ويشب
احلامه كبيره وف خياله حققها
حواديته كتير ومين يسمع ويصدقها
اينعم دنيته على اد كف ايديه
بس اه لو شافوا الناس الدنيا بعينيه
ح يلاقوها مرجيحه وكراسة تلوين
ح يلاقوها من غير كدب ولاغش ولا تلوين
ح يلاقوها كف صغير بيدعى يقول امين
عايز كل حاجه حلوه لنفسه وللبنى ءادمين
قوم يا صغير ولا يهمك
دول ناس معقدين
قوم واتنطط والعب بالكوره شمال ويمين
ومعلش مهما كان زعلك منهم
برضه انت بالنسبه لهم نور العين

اقر انا المذكور اعلاه

مين احب شخص لقلبك؟
ف الحقيقه معنديش ف القاموس بتاعى اسم تفضيل على وزن افعل
بعد الرسول عليه الصلاة والسلام اكيد ابويا وامى واخويا واختى
وفيه الواد خالد خليفه الساحر- والواد احمد الدجوى - والواد محمد الحداد
انسان مستعد انك تضحى بحياتك - وركز فى كلمه حياتك دى - عشانه؟
كل اللى بحبهم مستعد اضحى بحيات عشانهم بس انا عندى حاجه اهم هى اللى حاضحى عشانها...شهادة ان لا اله الا الله وان محمد رسول الله
انسان كرهته لدرجه الجنون وتمنيت لو تمسك سكينه وتنقض عليه وتغرزها فى قلبه وتقف تبص على جثته عشان تشفى غليلك؟
الحمد لله عمرى ما بكره حد..دا انا لو بتنرفز على حد بعدها بخمس دقايق بيصعب عليا وانا اللى بروح اصالحه..بس بصراحه عشان بكون اتنرفزت عليه جامد
ما هو اجمل كتاب قرأته لبشر ومحتفظ بيه حتى الان؟ متعلق بيه وبتقراه كل فتره؟
انا مش بتاع قرايه اوى بس اكيد كتب الطب اللى لازم احتفظ بيها واقراها من فتره لتانيه
اهم جهاز منزلى انت متعلق بيه وبتستخدمه كتير؟
الكمبيوتر بعتبره جهاز مش منزلى لان انا الوحيد اللى بقعد عليه...التليفزيون بقعد ادامه كتيرو انا سرحان عمال اقلب ف القنوات
عموما يعنى انا بحب اجهزة المطبخ السريعه اللى لما اكون جعان او عطشان بقدر عن طريقها احضر اكل بسرعه..اصل بعيد عنكوا انا اللى بجيب لنفسى الاكل والشرب
شئ تحس بالراحه النفسيه لما تنظر اليه؟
بصراحه بصراحه...وش اى بنت رقيقه وجميله بس تكون هى كبنت رقيقه
مكان تحس فيه بالحنين الى شئ لا تدرى ما هو وذكريات جارفه الى شئ؟
بحر اسكندريه ولما اكون راكب عربيه على طريق زراعى بالليل
اجمل مدينه زرتها داخل مصر؟
اكيد اسكندريه
شخصيه كرتونيه بتحبها؟
بحب كل شخصيات الكلاسيك كارتون...توم اند جيرى اولهم وبموت فى نايبلز الفار الصغير اللى بيطلع ساعات مع جيرى وبحب كمان البطه الصفرا اللى بتطلع معاهم..هى كمان مشكله....بموت فى دافى داك....وبحب النعامه والديب اللى مش عارف يلحقها
نوع هاتفك المحمول؟
اعتق موبايل فيكى يا شركة نوكيا....3300ومش ناوى اغيره
سرعه بروسيسور جهازك؟
واحد واتنين من عشره جيجا والرامات 265 بس فيه تجديد قادم وقريب اوى
المساحه التى تشغلها المواد الاسلاميه على جهازك؟
نادرا بصراحه لكن عندى كلها على اسطوانات
اهم هدف انت حاطه لحياتك دلوقتى؟
اكون دكتور فاهم ومش بتاع فلوس
مواصفات فتاة احلامى؟
لو ضحكت ضحكه ..ملايكه بتضحك ف عينيها
رقيقه وجميله..وبتحبنى
ايه شعورك لما تسمع اسم مصر؟
بغير عليها اوى وبفرح اوى لان مصر عندى عباره عن شوارع ومدن وناس مش حكام ومشاكل
لما تسمع كلام عن اليهود؟
بحس انى اقوى منهم وببقى نفسى احاربهم بقى
لما تشوف ضابط شرطه؟
ههههههه بصراحه ايام الشقاوه اخويا علمنى لما اشوف بوكس الساعه 4 بالليل احط ايدى على جيبى الورانى واشوف البطاقه معايا ولا لأ
وحاليا انا ليا اصحاب ظباط شرطه ومنهم واحد صاحبى اوى
ومش عارف ايه السؤال دا اصلا وليه؟؟
لون البطانيه اللى بتتغطى بيها فى الشتا؟
سؤال تافه مش ح ارد عليه
لون الجوارب والشرابات المفضل لديك؟
اللى ح يليق ع اللى الجزمه والبنطلون وساعات بختاره لون البوكسر...:))
احساسك اذا داست رجلك ع مخلفات حيوانات ... ولا مؤاخذه؟
انا لو راكب عربيه وداست على طينه بحس انى عايز امسح رجلى..فما بالك بقى...وانا بقى على فكره جزمتى انضف من دماغ ناس كتير..ولامؤاخذه
افكارك تجاه شاب ماشى فى الشارع لابس جلابيه بيضاء قصيره وله لحيه وبجيبه سواك وفى ايديه مصحف؟
بحترمه جدا وبقول يا بخته وممكن تلاقينى ف اليوم الواحد واقف مع تلاته اربعه كدا...بس انا مش ح ابقى كدا ف يوم انا لما ح التزم التزام تام ح اكون زى ما انا
احساس يراودك فى اشاره مرور مغلقه بسبب مسئل كبير؟
بدعيله ربنا يسلكله طريقه...ويبعدنا عن طريقه طالما بنعطله ويعطلنا
هل انت سعيد؟
اوقات بفرح واوقات بكون متضايق...السعاده مش موجوده بصوره كامله...بس اقدر انى راضى
لو اجتمعت انت وحسنى مبارك فى مكان واحد هتعمل ايه؟
مش عارف بس اكيد ح اقف منشكح اوى واحاول اخد صوره معاه...اصل ح اعمل ايه اكتر من كدا؟؟؟؟
لو معاك مليون ونصف هتعمل ايه؟
اى حاجه محتاجها ح اعملها وح اشترى ارض واحط الباقى ف بنك
بتحب مصر؟
جدا جدا جدا جدا جدا جدا جدا
انت مسلم؟
الحمد لله رب العالمين
ليه؟
لان الدين عند الله الاسلام...ولان ربنا بفضله خلى ابويا وامى مسلمين عشان اكون انا كمان مسلم
مين اكتر شخصيه متقدرش تستغنى عنها؟
عيلتى
اكتر موقف محرج؟
مفيش محرجه انما فيه مواقف مضحكه كتير منها كنا عند خروب امال اشهر خروب ف اسكندريه ومعايا اتنين اصحابى منهم واحد مليان اوى وكان اول مره يشرب خروب...وماعجبوش خالص وفجأه لاقيناه بيقول بصوت عالى...ايه البتاع دا؟ فين امال؟؟؟ فين امال؟؟وطبعا جرينا كلنا
اكتر امنيه نفسك تتحققها؟
كتير وربنا يساعدنى لانه هو اللى الوحيد اللى عارف نيتى

رجل الثلج 5

كان فاكر انه اتعلم م البشر خلاص
و بقى واحد عادى زى بقيت الناس
واتاري دا كله انهيار
انهيار جبل التلج بركان الاحساس
حاول يمسك نفسه ومايفكرش
ماهو تفكيره سبب محنته
حاول يمنع خوفه ورهبته
ينسى جراحه وكسرته
يهدى ف اشواقه ومحبته
ينسى مشاعره ومايتأثرش
وكل دا ف الاخر مانفعش
دى كل دمعه كانت حته منه...بتهد ف كيانه وبتشيل
ولو يمنع دمعه...غصب عنه تنزل ع الارض وتسيل
ولما ملقاش مفر...استسلم
استسلم لما بص ف عينيها
شاف نفس لهفتها عليه
نفس الخوف ماليها
المره دى صدقها
وليه ف اخر لحظه يقسى عليها؟؟
قال كان نفسى تعرفى...كان نفسى تحسينى
هو سابلك جرح..وانا كنت ح اسيبك بتحبينى
امنتك امانه فى بالك خلينى...امنتك ياحبيبتى بلاش تنسينى
ولما وصلت كان هو سوى الارض
فى غمضة عين ادامها اتهد
وادى مشهد البدايه....اتكرر اخر الحكايه
بس الشعور اختلف
بين دمعه نزلت ف الاخر...كانت ف الاول ضحكايه
وعدى يوم ويمكن شهور
فتح عيونه تانى ع الدنيا
لقاها نفس الدنيا ولقى نفسه غرقان ف بحر عيون تانيه
اجمل بنت بتعدل عليه طاقيه وكوفيه
وع الشفايف رسمت نفس الضحكه هى
وف ثوانى بقت هى كل شىء بالنسباله
و اول مامشيت فكرو اشتاق
سأل امتى ياشوق تانى رجعاله؟؟؟؟
THE END....

رجل الثلج4

اااه دا انا كنت ح اتنفس دلوقت بقيت مخنوق
اااه من كسرتى فى عز ما انا قايد لهفه وشوق
ليه الحب كدا؟
ليه سهم الهوا قليل اما يصيب قلبين ويحبوا بعض ف ثوانى
دايما يصيب قلب واحد ويفلت م القلب التانى
يخللى قلب عايش وقلب عايش للتانى
يفضل لا قادر يحبه ولاقادر ينساه
بعيد عنه مع انه عايش جواه

دا لو عرفتى بامر حبى ح الاقيكى لسه فاكراه
بتحبيه اكيد ومين يقدر ينسيكى ذكراه
اااه ياريت تمشى...تمشى دلوقت وتغيبى سنين
دا انا ح اشوفك ح افتكر جرحى
ويعذبنى الشوق والحنين
ولو مشيتى...قوليلى...ح اروح من بعدك فين
على دا الحال صاحبنا كان بيعيش
وبالفعل غابت...بقالها كتير مابتجيش
زاد عليه الهم...ماهو لسه بيحبها
انشغل باله عليها
وقال اللى جرى مش ذنبها
هو اللى حب واتوهم...وهى واللى مشيت ورا قلبها
ايام...ايام...ايام تعدى وتفوت
وهى فين...بس فين..ح يموت
باصص ع الناس والطريق...لو يسمع صوت رقيق...يصرخ حبيبتى عارفك
يسمع صوت نداها...ينده كمان معاها...حبيبتى فين مش شايفك
وف يوم شاف طلتها...خطوتها هى
فرح اوى لما...لقاها جايه
لكنه حس بكسرته مع انه مشتاق
حس فى لقاها طعم الفراق
حس بدمعه ماشيه على خدوده
مالحقش يستغرب
لقى شىء بيهز وجوده
لقى قلبه بيدق
وصوت انينه فى السكون بيشق
وهى جايه عليه..كل مايشوفها دموعه تزيد
بيتألم بيتهز بيترج من جديد
TO BE CONTINUED....

رجل الثلج3

البنوته جايه تشكى لسنو مان قالتله ايه؟

جربت ابكى ودموعى سبقت احزانى

همى مازال والحزن اكتر نادانى

بكيت على حبيب قلبى اختاره ونسانى

اول ماشوفته كنت محتاجه حد اتسند عليه

لقيت منه كل حنيه

لقيت الخوف عليا ف نظرة عينيه

كان كل يوم بيسأل عليا... بيطمن من غدر ايامى

مابقتش محتاجه لحاجه وانا جنبه

نسيت مخاوفى واوهامى

واما حكالى اسراره

حسيت انى بقيتله اقرب انسان

قلقه عليا خلانى فرحت

بصراحه فرحت...ماانا قولت الخوف للحب عنوان

حبيته وانا ف بالى انه بيحبنى كمان

وفضلت كل ليله اشوفه ف خيالى...دا خلى للياليا معنى

وحلمت بشكل حياتى معاه...شكل بيتنا اللى ح يجمعنا

ومن كتر شوقى معرفتش ادارى

محتاجه كلمة حب تطفى نارى

قولتله بحبك...يلا ح تقولها ازاى؟؟

ولا ح تاخدنى الاول ف حضنك؟؟

قاللى انا من كلامك مصدوم

ماتصورش تفتكرينى بحبك ف يوم

وفهمت...ماكملتش

هربت..ماتحملتش

انتهييييت

ضعت ومشيت اسأل الناس

هو الخوف والحنيه معناهم ايه؟؟

هو الحب اصلا احساسه ايه؟؟

مش يمكن يطلع الغلط منى..وانا اللى وهمت قلبى وجنيت عليه؟؟

سكتت خالص...ونزلت دموع تانيين

وصاحبنا واقف ولاهو هنا

عقله وافكاره تايهين

قال ف باله انتى بتحكى حكايتك ولا حكايتى

دا انتى زى ما انتهيتى

حطيتى بايديكى نهايتى

نفس الالم اهو صايبنى

لحظة جرحى دى لايمكن تسيبنى

اااه دا انا كنت بتنفس دلوقت بقيت مخنوق

ااااه من كسرتى ف عز ما انا قايد لهفه وشوق

to be continued

رجل الثلج 2

ابتدى عم سنو مان يطور فكره شويه وبعد ماكانت عينيه هى كل حاجه فيه بتحس وتفكر...ابتدت حاجات جواه تكبر من ناحيتها بالذات بس لسه مالهاش عنوان..وقرر خلاص ان اللى فيه دا حب

فتحت بابها وجريت جرى
ومن بعيد شافته واقف لوحده
ياعينى مستنى اى حد جاى
وصلت عنده واول ما عينيها جت عليه
لقيت الريح مستفرده بيه
بس الضحكه اللى رسمتها ف يوم م الايام
بتنطق ف وشه وماليه عينيه
ضحكت هى كمان..ضحكت بجد
يمكن عشان خوفها عليه كان ماله حد
وقفت جنبه فرحانه تحت الشمسيه
لحد الريح والمطر ما يهدوا شويه
وهو وقف مستغرب...ليه هى بتعمل كدا
كل مادا منه بتقرب...مش فاهم معنى لده
معناه الوحيده خوفها عليه
بس الخوف معناه ايه
مايعرفش
اصل الشعور مش ساكن فيه
صاحبنا قال مش لازم تفكيرى يوصل لحده
وليه يفكر وهى كلها كدا عنده
واتعدل ف وقفته فرد صدره
قال يعنى محدش اده
وبعد ما مشيت ابتدت مشاعره تتكون
لسه مفيش احساس لكن افكاره بتتلون
دا قرب ودا بعاد
دا استسلام ودا عناد
دى ضحكه ودى دموع ودا بكا بصوت مسموع
لقى نفسه عايز يفكر اكتر فيها عايز يشتاق بجد اليها
عايزها تعلمه ازاى يحس
ازاى يكون الكلام وازاى يكون الهمس
عايزها تحميه م الريح وشعاع الشمس
ماهى اتسببت ف وجوده
بعد ماكان عدم بالامس
بدأ شىء بزياده ليها يجذبه
عايز يرتعش
ينطق
يتحرك
لكن جموده بيغلبه
فيه شىء جواه عايز يثور وبيعذبه
قرر خلاص انها بتحبه
بس الحب مادقوش فى فلبه
اكمن قلبه ساكن مالوش دقات
وانفاسه بارده مافيهاش اهات
اهات الالم
واهات الحب بالذات
وزى كل مره جتله
بس المره دى تايهه
عيونها حيرانه
مش راسيه ف ناحيه
ويادوب ثوانى واتكلمت
قالتله عمرك مره دمعت؟
اكيد لأ...بلاش تجربها
بلاش احسن بتوجع
وكمان مهما كان صدقها
صدقنى ف النهايه
ممكن اوى تخدع
to be continued......

غدا باذن الله

حدوتة...رجل التلج1

اول ما فتح عينيه...حس قوام بلمستها
واقفه قصاده...وع الشفايف بسمتها
سعيده بحاجه....لروحها رسمتها
فضلت واقفه زمن..جواها ذكريات زمن....وهو عينيها فى عينيه
بتكمل ملامحه وهيئته...بتحط بايديها ضحكته...بكتب شهادة ميلاد ليه
لسه بيبدأ حياته...لسه عمره على اد صوابع ايديه
مشيت وفضل هو واقف لوحده...عمال يبص حواليه
الناس بعيده عنه... مش مهتمه ابدا بيه
مفيش حاجه على باله غيرها...ماهى اول ماشافت عينيه
وكانتكل يوم بتجيله لوحدها
تسرح وتغنى بصوتها الدافى
ساعات تكلمه وساعات سكوتها يكون كافى
تمشى وتسيبه بقيت الليل هو وليل القمر الصافى
يقف لوحده كتير...مفيش اى تفكير...مفيش غير صورتها
مستنى فى كل لحظه...يشوفها ف اى لحظه...يشوف بس ضحكتها
واقف لا حول ولا قوه...حاسس بس انه هو...يدوب ح يرتاح لرؤيتها
ويفرح لما يشوفها جت...ونظره اليها يتشد...يبصلها ويستعجل خطوتها
ويادوب معداش شهر
قاعده ف بيتها
لقيت برق ورعد ومطر
الدنيا بشتتى والناس بتجرى والطير هرب م الشجر
.. اول ماجه فى بالها هو صاحبنا
فتحت بابها وجريت جرى
to be continued....

فى هجاء الساحر الخالد بن خليفه

عامل فيها ساحر...وهو ف الاصل حاوى بزعبوط
اخره يتنطط ف الموالد...ويطلع من جيبه الكتكوت
قال ايه يقدر يطول القمر....قال ايه قائد جيوش الروم
دا الشارع بالنسبه له سفر...ويجرى لو قابله كلب ف يوم
دايما تتحدانى ودا عيبك...وتخيل ع الناس الاعيبك...ويهلولوا ويقولوا الله
اه لو يعرفوا الحقيقه...كانوا سموك شفيقه...دا انت غلبان ياولداه
اعترف مين فينا البوب احسن ما المك
ولما تسمع سيرتى قول عليا عمك
انا لسه ماقولتش حاجه....دى بس البدايه
مستنى تنطق حرف وانا اقول على كل الحكايه
وكفايه عليك كدا اصل الكلام خساره
اصل اللى زيك بيصعب عليا بحراره
كفايه تشريد وسياح
كفايه عليك يا صعيدى يا فلاح

قرار واعتذار

السلام عليكم
خلاص دخلنا ف معمة الامتحانات والبهدله وطلوع العين...واتحشرت فى مكتبى وحواليا كومه وتل كتب
ربنا مع كل اللى بيذاكروا وتعدى الفتره دى بسرعه ونرجع فريش تانى
من فتره كتبت قصة رجل التلج وكانت كبيره جدا واخدت فيها وقت ومجهود كبير لانى كنت بحاول ارتب المشاعر والاحساسيس اللى فيها وكأنى بكتب سيناريو والادهى من كدا انى بكتبها بقافيه مع مراعاة الوزن اللى هربت منه فى اغلب الاوقات
المهم انها واقعيه جدا وحاولت احط فيها فلسفه بسيطه اوى بتظهر ف احساس الموقف
مش بقول انها حاجه عبقريه...لا ابدا....عشان عارف نفسى وعارف حدودها بس هى بجد عزيزه اوى على نفسى
مالقش حل عشان انزلها ع التدوينه غير انى اقسمها على كذا جزء عشان طويله جدا
فكرت ف الاول ممكن تكون دى حاجه رخمه وقلة ذوق منى لما اقعد اقول تو بى كونتيود بس دا الحل عشان اسجل فى تدوينتى حاجه م الحاجات اللى كتبتها
عموما يعنى ضطريت اشيل الجزء الاول دا عشان ف الاجازه-دا لو اخدت اجازه-ابقى اقدر انزلها فى كذا بوست مافيش فرق بينهم غير يوم او يومين
بعتذر جدا جدا جدا لجهينه-وردة البلوج-عشان عملت ديليت للبوست وبقولها ادعيلى ف امتحاناتى
بالتوفيق للجميع

كله بيعدى

دايما بحلم كدا...بتمنى وامنى
ماشى طريقى كدا...اغنى واغنى
دايما مع نفسى افكر
افكر ف حبيبتى...مالى ف هواها حيله
افكر بشوق...تلقاها عينى ليله
اسرح فيها واطير...واعدى بخيالى مسافات طويله
وفجأه وانا ف سما الاحلام...اشوف احلامى مستحيله
لكن كله بيعدى...لما الفرح لثانيه يهدى
لو لحظه سعاده تزورنى...والضحكه تجيب وتودى
لكن كله بيعدى...لو ابص للقمر والاقيه
بيوعدنى بالحب ف لياليه...والحزن مكانه مش عندى
ساعات بلاقى الهوا ما يجيش على هوايا
وتغدر بى الظروف ويعاند زمنى ويايا
ويطلع ليل الامان نهار
وجنة القرب فرقه ونار
والقى عشمى فى اقرب ناسى...وهم جبار
لكن كله بيعدى...لما الفرح لثانيه يهدى
لو لحظه سعاده تزورنى...والضحكه تجيب وتودى
لكن كله بيعدى...لو ابص للقمر والاقيه
بيوعدنى بالحب ف لياليه...والحزن مكانه مش عندى

مش ليك

صدقنى ياقلبى مش ليك....كفايه اشواق كفايه
الف غيرها بيناديك....هواها مش نهايه
دور عليها فى غيرها...ما تنساهاش...لكن حاول تعيش
ح تلاقيها فى عيون بتحبك...مش زيها...ماحبتنيش
عايز تحبها؟...حبها
مالكش مكان فى قلبها
وهى عارفه انها
روحى فيها....وما بتضحيش
دور عليها ف غيرها...ما تنساهاش...لكن حاول تعيش
ح تلاقيها فى عيون بتحبك...مش زيها...ماحبتنيش
دى سابتنا نعيش فى نار....غابت وهجرت ليالينا
فضلنا نبكى ليل ونهار....وجاية تجرح ولا تداوينا؟
دور عليها فى غيرها..ما تنساهاش... لكن حاول تعيش
ح تلاقيها فى عيون بتحبك..زمش زيها...ماحبتنيش

كل 100 سنه وانت طيب يا اهلى

الناهرده عيد لكل واحد بيعشق اللون الاحمر...النادى الاهلى...اد ايه واحنا كبار كدا عمالين نسمع عن تاريخ عظيم للاهلى...تاريخ بحق يستحق ان يدرس..ملحمه وطنيه...ابداع ادارى...فن كروى...اخلاق وبطوله...الاهلى هو دوله داخل دوله..اذا لم يكن امبرطوريه فى حد ذاتها

والليله لقاء العمالقه فعلا....نهائى كوكب الارض

...بين افضل فريق فى الشرق...النادى الاهلى....وافضل فريق ف الغرب...برشلونه

انا بتوقع ان شاء الله الفوز للاهلى 2\1

اقر انا المذكور اعلاه2

تاج اتبعتلى من نوران...متشكر يانورانا
هل كنت طالب شاطر ف المدرسة؟
الحمدلله كنت شاطر...الحكايه بدأت انى مادخلتش حضانه من اصله..ووالدتى هى صاحبة الفضل انها علمتنى كتير اوى لدرجة انى لما دخلت اولى ابتدائى كنت اشطر من بتوع تانيه...هههههه اه والله
افتكر موقف فى اولى فى حصة الدين..كنت دايما باجى حافظ كويس والعيال تنضرب عشان مش حافظه...جيت ف مره وقولت انا زهقت وعايز اجرب كدا اقول لا مش حافظ...اصل انا دايما كدا لازم اعمل الغلط عشان اعرف الفرق بينه وبين الصح..مش بقتنع غير لما اعمل الغلط وافرق بينهم بنفسى....المهم يعنى انضربت...والبنتين اللى كانوا قاعدين جنبى زعلوا منى وماجوش يومها يذاكروا معايا.....طبعا نمت وانا بعيط..ومن ساعتها حرمت
على فكره كنت الوحيد اللى بيقعد جنبى بنات ف الفصل..مش عارف ليه؟
وبعد كدا كنت دايما الاول والحمدلله مع بنت اموره جدا كنا بنبدل مع بعض وسبحان الله دخلت
طب تانى وبعدين حولت معايا نفس الكليه. والغريبه نفس اللى بيحصلها بيحصلى برضه..نجحت تنجح سقطت تسقط...ياااااااااااااااااللقدر...(::
من ساعة بقى مادخلت الكليه ماشوفتش نجاح انما والله العظيم انا بحاول اكون دكتور فاهم اكتر ماكون دكتور حافظ بس...او حتى ابراهيم ولا محسن...هى هى هى هى هى
حلوه !!!!حلوه!!!حلوووووووووووووه
كنت عايز تبقى ايه وانت صغير؟
شاعر عاميه زى صلاح جاهين..بجد والله . انا بقرأ من صغرى شعر ومن ابتدائى كمان وكنت بحب صلاح جاهين جدا جدا جدا ولسه طبعا وكتبت قصه وانا ف رابعه واخدت جايزه ووالدتى هى اللى ادتنى الجايزه اصلها كانت عندى ف المدرسه..ههههههه ايواااااااااان كوسه يعنى.... سامعك ياللى هناك.. وكنت عايز ابقى ظابط شرطه ودكتور وعالم فضاء....كنت بموت فى الفضاء وبجيب من المكتبه دايما كتب جيولوجيا اتفرج على صور الفضاء..وكتب زرزور دا ولا اسمه بوزو ..مش فاكر
ودكتور زى كل العيال الصغيره ما بتقول
ايه اكتر مادة بتكرها؟
الحمد لله يعنى..كنت بكره كل المواد...كنت بروح المدرسه بس عشان...احم احم اصحابى يعنى..وعمرى ماحبيت ماده بعينها..كنت بكره جدا كل حاجه متعلقه بالدراسه بس كنت بذاكر عشان الموقف اللى حكيته من شويه..اعوذ بالله كنت بكره السطور والاقلام والاساتيك وعندى عقده من المنقله وعندى فوبيا من المساطر...وبخاف من البراجل..وكراسة الرسم البيانى...يييييييع..اعوذ بالله دا احنا كنا بنتبهدل ف المدارس...ايوه معاك ياللى هناك انت... ان الكليه برضه بهدله بس على الاقل ماشى بمزاجك وحر كدا ياخى...عايز تدخل المشرحه لا مش عايز...عايز تذاكر وتنجح ؟لا والله انا عايز اسقط السنه دى...وعيش مع موووووودك يامعلم
ايه الهواية اللي لما تكون فيها بتنفضل عن العالم الخارجي؟
كنت بعمل كوره من الورق لكبيره والعب بيها لوحدى -اصل اتربيت لوحدى بعد اخويا واختى ما اتجوزوا-وافضل العب بقى ولو مصر اتغلبت كالعاده لازم كنت اخليها تفوز وانا بلعب واتخيل مجدى طلبه الله يمسيه بالخير بيجيب الجون اللى ضيعه ...الله يسامحه..الكوره جياله ع الارض...وحضرته نازلها بدماغه عايز يجيبها بدماغه....طلبت معاه يجيبها بدماغه ...حيل الله لازم اجيبها بدماغى ويقولوله ياعم لا..يقول مفيش ياعم انا ح اجيبها بدماغى وطبعا هو اللى دخل الجون والكوره ومصر خرجت بره الدنيا كلها.... وماراحتش مصر كاس 94...دا انا يوم ماتش زيمبابوى عيطت عيااااااااااااط. ومن ساعتها ما شجعتش المنتخب تقريبا غير بقى فى 2006..بس ربنا يخليهولنا الاهلى دايما مظبطنى كدا ورافع راسى..اهلااااااااااااااااااااااااااااااااااااوى
المهم وطبعا الكتابه هى اكتر حاجه ممكن تخلينى انفصل عن العالم بس مابقتش اكتب زى الاول خاااااااااااااااالص بقيت اقعد مع نفسى وخلاص والقرايه والكمبيوتر
فى النهايه ح اعمل للتاج ثرو لوب من فوق المدافعين ل...الساحر....جهينه...وعد العيون...دودى

احكيلها يا قمر

احكيلها ياقمر عنى
وانا فى ليلها سهران
قولها يا حته منى
هوايا جوايا حيران
ماهو لولا خوفى وحيرتى...ماكنتش بعتك مرسال
كنت اروح فورا لحبيبتى...واقولها الشوق قتال
لكن ياقمر حكمت عليا الظروف
ارسمها واكلمها ف السر
ياقمر وحياتك اعمل معروف
بسرعه قبل ما العمر يمر
سمعها غنايا فى جوف الليل
وريها دموعى على حبى دليل
قولها طيفك عليا بخيل
بيزورنى فى اليوم ييجى ميت مره
والله عليا قليل
وف اليله بموت من شوقى مستنى بكره
لاجل ماشوفك ياجميل
ياقمر روح وبلغها..مستنى الرد الليله
ماهو لسه اليل عليا طويل

صورة حبيبن

حكاية صورة حبيبن امر القدر يفترقوا

غصب عنهم سابوا احلامهم يتسرقوا

قالتله ح نقسم الصوره نصين

انت تاخد صورتى

وصورتك ح اشيلها فى ننى العين

وبكدا نضمن اننا من تانى راجعين

ياحبيبى اطمن...اكيد من تانى راجعين

ومرت الايام

تصحى من نومها تقوله ف الصوره واحشنى

سامحنى واه م الزمن هو اللى عنك حايشنى

وهو شال صورتها ف سلسله حطها جنب قلبه

وساعات يشوفها ادام عينيه وساعات واقفه جنبه

وقدر الزمن ينسيهم امر الفراق

وراحت لغيرهم من جواهم الاشواق

لكن الحب فضل جواهم محفور

ساكن ف القلوب ف قصور

وفيه ناس بيقولوا الحب ضل طريقهم

والزمن سرقهم من قبله

وفيه بيقولوا لأ

دول رجعوا من تانى اتقابلوا

لكن الواضح ان اللى حصل شىء سعيد

لأن الصوره ادامنا...كملت من جديد

وعلى ضهر الصوره كان مكتوب....ذكرى حب وشوق وغرام

اترسم حرفين وشوية قلوب...بتاريخ يوم من ذات الايام

واهو راحت خلاص القلوب..لكن الصوره ماراحتش

تحس القلوب ع الصوره بتدق...ماوقفتش

زي ما يكونوا حاسين

انهم لبعض راجعين

ف الارض ولا السما

ماتعرفش

!!!خيانه

فكره كانت موجوده فى مسوده عندى...فكره غريبه بس قولت ح اكملها عشان ما احرمش نفسى من حاجه
ما كنش حاسس باى حاجه غريبه
حاسس فى بعدها دايما قريبه
اداها عمره وهو مغمض عينيه
والغلطه انه غمضها
وقال حبيبتى حياتى هيا
شريكة عمرى اخترتها
وفى يوم راجع بيشكى الغياب
بيحلم بليله ما وصفهاش كتاب
بيفتح سمع ضحكه من ع الباب
ضحكه وهمس دافى...واهات مكتومه
وريحة الخيانه طالعه مسمومه
قال وكأنه بيعيش تانى اللحظه ديا
قال ساعتها ماصدقتش عينيا
وقفت وسهم الغدر مغروس فى صدرى
لقيت سم الخيانه فى دمى بيسرى
لقيتها على سريرى
مش ف حضنى
ف حضن غيرى
فوقت وانا ايديا غرقانه فى دموع ودم
وف ودنى اخر كلمتين قالتهم
لسه حافظهم صم
صرخت باسمى وياريتها ما نطقته
اللى عمرها ماحست بيه ولا قدرته
قومت وقولت مش ندمان
ولو عاد بيا الزمن
ع اعمل اللى عملته الف مره كمان

ساعة الغروب

كالعاده واقف باصص للسما وسرحان
هربان من دنيا مخلوق اسمه الانسان
على شطك يابحر ويا هواك
راسم لنفسى جنه بعيد هناك
جنه قادر اعيش فيها ملاك
عند قرص الشمس الاحمر ساعة الغروب
عند السحاب الابيض على هيئة قلوب
جنه فيها بحر يا بحر زيك برضه
لكنه مليان فرح بطوله وعرضه
مستيانى حبيبتى على شطه
بتقولى اتأخرت ليه عليا
مافيش اعذار غير ان
عشان كنت بتفكر فيا
ونجرى سوا وايديها ف ايديا
وتاخدنا الشمس معاها وتغيب
تاخدنا لعالم غريب عجيب
عالم لون عينيها اللى مودبانى
عالم لياليه مخلوقه بس عشانها وعشانى
عالم نجومه من حروف اسمها

والقمر فيه وشها
يااااااه اما دى خدتنى الاحلام لفين
والشمس غابت راحت لفين
كنتى استنى يا شمس حبيتين
عشان تقولى لحبيبتى استنينى
معادنا بكره
فى نفس الوقت
ومن دلوقت
وحشتينى

حاولنا ومقدرناش

حاولنا ومقدرناش
جينا نحب...ما اتحبناش
قولنا ندارى الحزن فى دموعنا
بس الدمع لوحده ماكفاش
حاولنا ومقدرناش
حاولنا نحلم بكلمة حب ما قالهاش
ونوهم عيونا بدنيا ماعيشنهاش
حاولنا نحلم
مات الحلم...والجرح عاش
حاولنا ومقدرناش
ياخساره ضاع العمر بلاش
ياريته ماضاع حبنا
ياريته كان حبنا
ولا سابنا يوم وحدنا
ياريته ما جرحناش
حاولنا ومقدرناش
حاولنا نكونله احباب
نسهر لعيونه وندوق العذاب
وفى عز الليل دقينا الباب
لكن الرد ماجش
روحنا دارنا مكسورين
ما نمناش
حاولنا ومقدرناش
ياريت حتى يفتكرنا...ما ينساناش
ولو فى يوم حس بينا
ييجى يقول
مايستناش
ح يلاقينا لسه بندوب
ما توبناش
ح نخليه يحبنا مع اننا
حاولنا ومقدرناش

ردت فيا الروح

حاجه خفيفه كتبتها...مش قويه... انما كتبتها مع نسمة هوا بجد ردت روحى... هى اهداء خاص من القلب
عارف بعدك كنت بقاسى...شوفت العذاب الوان
وسألت روجى ليه كدا ناسى...ليه فايتنى حيران
ويوم ماجتلى...الدنيا ضحكتلى...وردت فيا الروح
ردت فيا الروح يا حبيبى....ردت فيا الروح
خدنى فى حضنك يا حبيبى....ما تسبنيش وتروح
وحياتى ما تبعد تانى عنى
انا ياما سهرت مستنى
اقول معقوله يحن
ويعود بعيونه يطمنى؟
ويوم ماجتلى...الدنيا ضحكتلى...وردت فيا الروح
ردت فيا الروح يا حبيبى....ردت فيا الروح
خدنى فى حضنك يا حبيبى....ماتسيبنيش وتروح
مش ح اقولك بحبك...لتزعلك منى
بس وصى عليا قلبك...ياخد باله منى
دا انت يوم ماجتلى...الدنيا ضحكتلى...وردت فيا الروح
ردت فيا الروح ياحبيبى...ردت فيا الروح
خدنى فى حضنك ياحبيبى...ما تسيبنيش وتروح

احنا ايه غير اسم

احنا ايه غير اسم باقى على مر الزمان

يحكوا ويتحاكوا عليه

ويقولوا دا كان وكان

فيه اللى زرع نخله...وأكل منها ناس بعديه

فيه اللى حب بلده...وضحى بدمه لاجل ما يفديه

وفيه العاشق الولهان...اللى حبيبته لايمكن تنسى لياليه

فيه اللى نقول عليه دا كان جبان

فيه اللى نقول يا سلاااااام

اما دا كان حقيقى انسان

فيه اللى نقول دا كان قاعد هنا

بيغنى...اوقات زعلان...اوقات فرحان

احنا ايه غير اسم باقى على مر الزمان

يحكوا ويتحاكوا عليه

ويقولوا دا كان وكان

فيه اللى كتب كلمه...وكانت ليها جوانا احساس

فيه اللى داوى داء...واحيا امل فى نفوس ناس

فيه اللى جه الدنيا ومشى...واهو مشى منها خلاص

فيه اللى ف عز خوفنا خدتنا بالاحضان

ربتنا على دين وحب وحنان

فيه اللى شقى لاجل مانعيش

فى عزة نفس وراحه وامان

احنا ايه غير اسم باقى على مر الزمان

يحكوا ويتحاكوا عليه

ويقولوا دا كان وكان

مكتوب

انكتب عليا يادنيا ومكتوب
وياترى ايه لسه مكتوب
مكتوب عليا اعيش وللكلب دين فى رقبتى
وادوق بطرف لسانى يادوب...نصيبى من سعادتى
فى لعبتك يادنيا معايا...عمرك ما اتغلبتى
ارمى الزهر تطلعى بيا لفوق...وييجى الدور عليكى
القى البساط من تحتى مسروق...اقع ولا تمديش ايديكى
اهوى ينكسرلى ضلع...يرشق فى قلبى
اقول الاه تقولى استاهل
طب ايه ذنبى؟
ذنبى انى طلعت السما ولما جيت اقع
ما لقتكيش جنبى؟
خلاص يادنيا فهمت اللعبه
لو جالى الزهر شيش يعنى يك
لو الباب اتفتح فى وشى يعنى اتسك
لو الحقيقه شمس ادامى
ح اكدبها بالشك
السكوت يعنى مكر خبيث جبان
والكلام مخبى وراه ابشع انسان
الصرخه يعنى ديب بيعوى بيتألم جعان
والهمسه واحده خاينه وياعينى ع اللى اتخان
اللى يضحى عايز التمن اضعاف
واللى يداوينا بيجرحنا فوق الجرح جرح كمان
ح نعيد اللعبه يادنيا تانى....ما انا خلاص فهمت ووعيت
ح العب واكشفلك ورقى....عشان ما تقوليش خبيت
وياراكب يادنيا يامركوب
يا راكب يادنيا يامركوب
ياارجع بطل
يااضيع اسير حروب
والعجيب انه فى الاصل انكتب ومكتوب
وياترى ايه لسه مكتوب
مكتوب عليا يا دنيا مكتوب

مش لبعض

كل واحد فينا طالع من قصة حب
بكيت لها العين
وانجرح عشانها القلب
بنضحك على بعض واهو اسمه حب
بنداوى الجرح ازاى بالكدب
صدقينى صعب حكايتنا تطول
اصل احنا مش لبعض م الاول
ياما شوفتك سرحانه فيه جوا عينيا...يا ما استنيتك تنطقى باسمه
بس ما كنتش هقبل غير انك تفكرى فيا...ولا كنت هقبل يفضل لقلبك حلمه
بنضحك على بعض واهو اسمه حب
بنداوى الجرح ليه بالكدب
صدقينى صعب حكايتنا تطول
اصل احنا مش لبعض م الاول
وانا برضه اكيد معايا ظلمتك
فكرت فيها وانا معاكى
انا فعلا يا حبيبتى خونتك
لما قولت انك ملاكى
اصل دى كانت كلمتى ليها
كانت بتحبها وبتفرح بيها
بنضحك على بعض واهو اسمه حب
بنداوى الجرح ليه بالكدب
صدقينى صعب حكايتنا تطول
اصل احنا مش لبعض م الاول

واحد تانى

واقف معاها بنتكلم....بتمنى اسمعها منها
شوقها خلانى اقول....مش ح اخبى حبى عنها
قولت ف وسط الكلام بحبك متداريه
وسألت عينيها امتى هتجاوبى عليا
كان باين م الاول انها......هتقول خلاص عاشقانى
ولما جت تنطق باسمى نطقت.... باسم واحد تانى
ساعتها ما كملتش كلامى...بصيت فى عينيها وسكت
سلمت عليها عادى....وجوايا اكيد اتألمت
طب كنت بحس بشوقها ازاى....ليه كنت فاكرها علشانى
ولما جت تنطق باسمى نطقت....باسم واحد تانى
دلوقت بس عرفت...انى مليت بالوهم حياتى
كانت مجرد حلم....فضلت احلم بيه ليلاتى
ياخساره ياقلبى مش هتقدر....فى يوم تقولها واحشانى
ماهى جت تنطق باسمى نطقت ...باسم واحد تانى

الف غنوة مجروحين

كل ما احلم وانسى اى واقع حزين

وارجع مشتاق لعينيكى يا ست الحلوين

افكر اقول بحبك ازاى...اسكت

واقول بدالها الف غنوة مجروحين

وعجبى

تعالى الليله دى

مقدرتش انسى ...يوم ما كنتى قصادى
كان باين علينا الشوق.... كان الكلام مش عادى
واما اللقا جمعنا تانى....لقيتنى بقول حبيت
بتكلم وبقولك من قلبى....دا انا ياما استنيت
تعالى مره وما تخافيش
لو حاسه قلبك حبنى
تعالى الليله دى نعيش
واقول لحضنك ضمنى
هاتى ايدك يلا......قوليها وعلى صوتك
دا القمر بينادى....اوعى الليله دى تفوتك
ايوه محتاجلك تهمسيلى....حسسينى بدفا الايدين
ايوه محتاج الليله ديا....ندخل فيها دنيا العاشقين
تعالى مره وما تخافيش
قولى لو حاسه قلبك حبنى
تعالى الليله دى نعيش
واقول لحضنك ضمنى

بيان هام

موضوع البوست دا كنت هنزله فى اول يوم ف السنه بمناسبة السنه الجديده بس حصل ظروف ومادخلتش خالص
وجه الوقت انى انزله عشان اوضح حاجات صغيره بس عندى كبيره جدا
اول حاجه انا عامل التدوينه دى لمجرد تخليد كلام كتبته او ذكرى وعشان كدا مسميها مذكرات قلب
عامل التدوينه دى عشان بعد ما اموت ويمكن دى كانت اجابتى على سؤال فى تاج قديم اوى
ثانيا مش معقول طبعا هعمل تدوينه ويجيلى كومينتات اد كدا غير لما اعمل كومينتات على ناس كتير عشان على الاقل يعرفونى او يردو الكومينت بتاعى
صح؟
انا مش بعمل بقى غير كومينت على خمس تدوينات بعتبرهم بجد اصحاب وبحب دايما انهم يقولولى رأيهم
نوران...ودى اخف دم شوفته فى حياتى وشقاوه مالهاش حدود وعقلها لما بيفكر بيبقى الكترونى بس لما تهيس بيبقى عقلها حلزونى
انا بهزر يا نوران وبقول كدا من عشمى طبعا...اوعى تزعلى
دودى:اكتر واحده رأيها بيهمنى لانها غالبا بتفهم التكه اللى كاتبها ف البوست..يعنى الحاجات السبيشيال اللى بين السطور وطبعا هى عبقرية مواضيع..مافيش موضوع كتبته قالش او مش حلو بس بصراحه بحس بغموض بسيط فيها ويمكن تكون حاجه حلوه
الساحر ووعد العيون وحازم دول ليهم بوست لوحدهم ...كفايه انى اقول انهم اصدقائى الانتيخ
والخامسه هى اميرة القلم...انا عارف انى مقصر معاها ومش بعمل كومينتات عندها كتير انما والله بتابع كل حاجه بتكتبها وهى فيها حاجه غريبه
انها بتكتب كل حاجه بحس بيها..وبتسبقنى وتكتب عن حاجه عايشها وهكتب عنها ومش كدا وبس...دى بكتب بطريقه استحاله هعبر زيها
احساسها عالى جدا وبجد بتعلم من رقة الكلام بتاعها
دا مش رأيي فى الناس الحلوه دى انما دا شعورى ناحيتهم وفى نفس الوقت دا توضيح لحاجات كتير اهمها ليه مش بعمل كومينت غير عندهم..وليه مفيش كومينتات كتير عندى...ولو عايز كومينتات كتير عندى ما فيش احسن من انى اعمل عند كل الناس كومينت بيقول ياريان يا فجل... بس الفكره انى مش عايز ادخل على ناس كتير وكفايه الناس الحلوه دى...عندى بالدنيا كلها
وف النهايه انا والله معرف انا كتبت ايه ومش هقراه ولا هعدل فيه حاجه
سلام

ما تبصيش وراكى

فكره مطرقعه ولقيت كلامها كدا تلقائى بيطلع منى والله..ونعتذر على تدنى مستوى الكلام والاسلوب

بتشاورى وتقولى انا؟
ايوا انتى ما تبصيش وراكى
استنى هاقولك هنا
ما انا مش هجرى وراكى
طب كلمه بس واسمعيها يا عينيا
شكلى بقى وحش وبيقولى مش سأله فيا
انا برضه مش سايبك مهما يكون
خدى بالك بقى
لاحسن دا انا مجنون
اسألى عليا يقولولك كام واحده دايبه فى غرامه
كام واحده بتحلم بيه وبتموت فى سحر كلامه
لكن بصراحه والشهاده لله.....ادامك لسانى ما نطقش
حضرتلك كلام من اياه.....جيت اقوله ما طلعش
اصل الجمال يا جميل بيسحر
من كتر حلاوته يطير العقل ويسكر
انا برضه مش سايبك مهما يكون
خدى بالك بقى
لاحسن دا انا مجنون

رباعيات

فى كاساتك ياخمر لقيت اللى بتمناه
كل ما اطلب طلب ادام عينيا القاه
وبعد ما تخلص الازازه والكاس
القى الحزن ما ينسانى لو مهما انساه
وعجبى
مالك ياقمر مش هو دا نورك
مش هى دى ليالى الحب فى قصورك
ياترى دليلك لسه فيه عنوانى؟
ولا اسمى خلاص اتمحى من سطورك
وعجبى
من نار الوحده انا قولت يا فكيك
ويا قصر الحب افتحلى الباب والشبابيك
ع الباب لقيت يافطه بتقول
عذاب الحب بيرحب بيك
وعجبى
يا دنيا ليه بتغضبى كل ما اغنيلك
يا دنيا نفسى ولو مره تتمى جميلك
نفسى تكمل فرحتى ولو يومين
ولا هو كيفك عن همومى احكيلك
وعجبى

ليه يا قلبى

دا عتاب صغير كدا بينى وبين نفسى...كنت راجع من الكليه فى المواصلات..بسب موقف حصل خلانى احس انى عايش بروحين روح بتحارب التانيه..وزى ما قولت عتاب بينى وبين نفسى ..ماحدش هيفهمه

عايش عشانك يا قلبى..... وبرضه مش عارف اعيش
ولقيت حبك وحبى.....وقلتلك ما تخبيش
لا عرفنا ندارى ولانسينا
ولا حتى عرفنا نقول حبينا
واسألك ليه يا قلبى تقوللى ما تسألنيش
انا عارف جيت عليك كذا مره
وحبست فيك طيور الحب الحره
لكن كنت بتصعب عليا واطاوعلك
الاقيك فرحان ساعتها واسهر اسمعلك
ولما احتاج اليك ادور...ملاقيش
واسألك ليه يا قلبى تقوللى ما تسألنيش
يا قلبى زى ما دموعك بتهز فيا
ياريت ما تلعبش بيك وبيا
يا قلبى انت دليلى فى الضلام ساعة النهار
يا قلبى انت ونيسى ساعة الانتظار
وعدتنى هامسك الحلم بايديا
لكن ما قدرتش فى مره ما تخلفنيش
واسألك ليه ياقلبى تقوللى ما تسألنيش

حدوته:تحت المطر

زمان فى ايام الشتا
وانا صغير ومن ورا شباكى
بتفرج على نقط المطر
واسرح يا احلامى معاكى
كنت بشوف الناس بتجرى...اللى لوحده واللى معاه اصحابه
واللى ماسكه شمسيه ...واللى بسرعه بيقفل بابه
شوفت مره والمطر شديد
واحد ماشى مش وحيد
كان هو وحبيبته بيجروا فرحانين
وايديهم بتحاول تمسك نقط المطر النازلين
صوت ضحكهم كان بيدوى مع صوت المطر
جريوا واستخبوا تحت شجره من الشجر
وقفوا يضحكوا ووقفوا ساكتين
حسيت بالكلام ما بينهم...كلام الحب والعاشقين
وخلص المطر ومشيوا وايديهم مشبوكين
واتمنيت اكون فى يوم مكانه
ويا حبيبه تحت المطر متواعدين
وفى يوم شوفته ماشى لكنها مش معاه
كان بيبص حواليه وتايه ياوالداه
وقف تحت الشجره لكنه افتكرها
مقدرش ساعتها يقف وكمل بسرعه خطاه
وانا ساعتها حزنت وقولت يااااااه
فين راحت حبيبته وعلى فين
من غيرها يا دنيا واخداه
وكبرت
وكبرت ولسه دائى حب المطر
امشى تحتيه لا يهمنى برد ولا خطر
اغنى وايديا فى جيوبى
واتمنى حبيبه زى القمر
ولقيتها
حبيبتها
ودوبت انا فى لياليها
كان اخرى ابصلها من بعيد..واسرح فى عينيها
لحد ما كلمتها وانا وهى اتمشينا
كان كلامنا رقيق والاحلام بريئه فى عينينا
وهجم السحاب ونزل المطر بشويش
بصتلها
لقيتها ضحكت
وزى ضحكتها والله مافيش
جرينا وافتكرت وانا صغير
افتكرت احلامى واان واقف تحت المطر
ووقفت معاها تحت الشجره اياها
قلبى بيرقص م الفرحه انى معاها
بصيت لقيت طفل صغير بيبص علينا من هنااااك
قاعد وايده على خده من ورا الشباك
قلبى ساعتها خاف تتسرق فرحته
خاف تروح حبيبته ويبقاله دمعته
مسير الطفل دا يبص عليا وانا وحيد
ويصعب عليه حالى
سكت وسرحت وقولت
مالك يا دنيا بس ومالى
ندهتلى وقالتلى مالك؟سرحان فى ايه؟
ماخبتش عليها وقولت ع اللى بفكر فيه
اتبسمت ومسكت فى ايديا
قالتلى ياللى حبيتك بجد
انا قلبى وروحى وعمرى ليك
مش هفارق فى يوم عينيك
خدنى فى حضنك خلينى احس بيك
دا انا يا حبيبى بحبك
قوللى بحبك الله يخليك
وقولتها
قولتها وانا داخل تحدى مع القدر
قولتها لحبيبتى
واحنا واقفين تحت المطر

ادام عيونك

قاعد من بدرى باصص ياحبيبتى عليكى

شايفك وما انتيش شايفانى

شايف كلامك معاهم وضحكة عينيكى

واقربلك وانا ف مكانى

وجت عينك فى عينيا

قلبى دق وبصيت حواليا

خوفت لنظره منى ليكى

تتكلم وتقولك ع اللى بيا

بس انتى اخدتى بالك وكشفتى كل اسرارى

بس انتى اكيد جه ف خيالك انى بحبك وبدارى

وبقيت حاسك عماله تبصيلى حاسك عماله تندهيلى

مقدرتش على شوقى اللى ملانى

ومع انى لسه شايفهم من ثوانى

لقيت عيونك حبايبى وحشانى

وعلى طول لقيتنى باتبسم وبقول لعينيكى

بحبك بعشقك والله دايب فيكى

كتكوت

دى اغنيه غناها محمد سعد فى فيلم كتكوت..اللى شافها اكيد مخدش باله من الكلام من كتر الضحك اللى ف المشهد انما حقيقى كلماتها عجبانى..زودت فيها بسيط اوى ف الاخر....وبهديها لكتكوت كان فى حياتى

كتكوت ضعيف الجناح والدنيا غدرت بيه
رماه عليا الهوا وشكالى ع اللى بيه
صعب عليا وخدته لأجل ما اربيه
قلبى الحنين جعله عش يسكن فيه
ف الصيف يهون عليه وف الشتا يدفيه
وطعمته من حب عينى كل ما يرضيه
وسقيته كاس الحنان ترياق دوا شفيه
وقام لما ريشه طول
والعافيه جريت فيه
جرح قلبى وهجرنى
وطار
اتاريه خسيس ماطمرش فيه
وح يجى يوم واقوله
مسير جناحك ينكسر ويدور ع اللى يداويه
وبجى يقوليلى فاكر زمان؟
وانا اقوله انسى اللى كان
واياك حتى تفكر فيه

النشيد الوطنى للاهلى-انا دمى لونه اهلى

الاهلى هو عشقى الاول والاخير...هو الانتماء الوحيد الحقيقى فى زمن
المسخ..الاهلى اكبر من اى كلام
ودى اقل حاجه بقدمها لوطنى التانى....الاهلى

انا دمى لونه اهلى
وقلبى بيدق اهلى
كل جزء فيا
بيحبك يا اهلى
شوف تاريخنا مليان كام لحظة نصر
ولسه اسمنا ح يكون عنوان كل عصر
وراك...ومعاك
ولو محتاجلى
ما انا دمى لونه اهلى
وقلبى بيدق اهلى
وكل جزء فيا
بيحبك يا اهلى
علمتنا انا الاخلاق قبل البطوله
وعشان كدا بطوله ورا بطوله
بتيجى بلعب وفن ورجوله
وراك....ومعاك
ولو محتاجلى
ما انا دمى لونه اهلى
وقلبى بيدق اهلى
وكل جزء فيا
بيحبك يا اهلى

اعدام مظلوم

فى عز الضهر والناس ملمومه

واقفين كلهم وانفاسهم مكتومه

والريح بتحرك انفاس غضبانه مغمومه

والكرسى فاضى مستنى الضحيه

بس الناهرده مش اى يوم

الناهرده يوم اعدام مظلوم

زاد الصمت ومعاه عليت دقات القلوب

العيون سرحانه بعيد والفكر مسلوب

محدش قادر يتكلم......الكل على امره مغلوب

واللى ح يتكلم......يلاقى الموت عليه مكتوب

حاسين بعذاب الضمير......اصلهم كانوا السبب

ظلموا الضحيه كتير......وحكموا عليه بحقد وغضب

صوتهم كان عالى ساعتها ومسموع

قالوله جريمتك هى حبك.....والحب ممنوع

وصدر الحكم ع القلب الغلبان

يدفع تمن حبه....عذاب وحرمان

والموت مصير وقدر حكم بيه الزمان

دلوقت صوتهم فى جوفهم انحشر

تشوفهم ما تقولش عليهم بشر

واحمر قرص الشمس وزاد غضب الريح

والطيور همهمت بصوت متحسر جريح

وجت اللحظه الاخيره فى حياة قلب عاشق

ماشى باصص ادامه...مش خايف بس شارد

طلع ع الكرسى...حس بلفحة هوا بارد

وقف لحظه وبص ع الناس بكل اسف

كان خايف يشوفها مع انها وحشاه

رجع تانى بسرعه ومع الذكريات تاه

عدى شريط العمر ادامه بيجرى

كل لحظة حب بتهون بلواه

ياما عاش معاها ليالى....ياما شاف

اطمن لما خيالها حواليه....طاف

ومين يحس بحضن حبيبته...ويخاف

وخلاص الحبل حوالين رقبته اتحكم

بص بعيد وادام عيونه اترسم

صورة حبيبته

بتنادى ودموعها بتجرحها

مد ايده عايز يطولها ويمسحها

فجأه وقفت ايده ف الهوا......ماطالتهاش

مات وحتى احلامه ما لمسهاش

وطلعت صرخه من حلق طير

واقف على شجره من غير ورق

بيصرخ حزنان على قلب

حبيبه منه اتسرق

ضحكت-عمرو دياب

انا مش قادر اقول الاغنيه دى اد ايه جمييييييييييله اوى...من حفله للهضبه عمرو دياب ومتوقع نزلوها ف الالبوم الجديد
لكن بعيدا عن الالبوم دا ...كلمات الاغنيه بجد مقطعانى والقريبين منى ح يحسوا كدا اكيد
المهم يعنى دى كلمات الاغنيه ودا اللينك عشان اللى عايز ينزل الاغنيه من الحفله..ياريت اللى يقدر ينزل ويسمعها يكون احسن عشان اللحن برضه مع الكلمات عامله جو حلو اوى وكمان مساحتها صغيره اوى
بيقولوا انها كلمات الاسطوره بهاء الدين محمد..استاذى ومثلى الاعلى
http://www.amrdiablegend.com/download/concerts/D7ket-AmrDiabLegend.Com.mp3
ضحكت يعنى قلبها مال ..وخلاص الفرق ما بينا اتشال
يالله يا قلبى روحلها قولها كل اللى بيتقال
مستنى ايه بعد الضحكه ..دى الضحكه فاتحالك سكه
مش هيا دى اللى انت عاشقها و بقالها ياما شغلا البال
ضحكت يعنى حسا هواك ..و موافقه تعيش العمر معاك
روح يا حبيبها دنتا حبيبها احضن شوقها اللى استناك
ضحكت يعنى قلبها مال ..وخلاص الفرق ما بينا اتشال
يالله يا قلبى روحلها قولها كل اللى بيتقال

انا وحبيبتى

قالولى حالها بعدك صعب
قالولى ارجعلها قولت صعب
خلوها تحس بغلطتها...وتجينى ساعتها...وعينيها ف الارض
تقوللى بارق صوت...بحبك موت...وشوقى مالوش حد
مع انى عارف اد ايه بتعانى
لكن عنادها جدا انانى
وبتعمل قال مش شايفانى
واما اكون مش شايف
بحس عينيها مش سايبانى
بين الناس ضحكتها بتقول...ادينى عايشه بيك ومش بيك
وعينيها بتصرخ على طول...قلبى بيتقطع قلبى بيناديك
اكيد شوقى مش اكتر منى..اكيد دا هى حته منى
ما قدرتش على قلبى اللى معاها عليا
روحتلها واتاريها مكانها مستنيه
لقيتنى ادامها واقف...ومش دريان
بقولها اسف..يا حبيبتى انا الغلطان

بيحبنى

جانى اخيرا بعد ايام تفكير
انا معجبه وهو بيبصلى كتير
كلمنى وانا ويا كلامه سرحت
رديت بابتسامه واتنهدت
حسيت بخوفه ولهفته عليا
سكت وقلبى قال لعينيا
بيحبنى....اكيد بيحبنى
زى ما انا دايبه فيه
هو كمان اكيد....بيحبنى
بس ليه انا لسه خايفه
وايه اللى قلقنى مش عارفه
يمكن عشان لسه مش متأكده
يطلع ما بيحبنيش بعد كل دا
مسكت الورده وبين كلمتين احترت
بيحبنى...مش بيحبنى
وعلى اخر روقه لقيتنى فرحت
اصله طلع بيحبنى
بيحبنى....اكيد بيحبنى
زى ما انا دايبه فيه
هو كمان اكيد...بيحبنى

عمرو دياب والبومه الجديد

طبعا انا بستنى البوم عمرو وبفضل احلم بيه وطبعا بينزل منه تراكات اوبيغنى اجزاء فى حفلاته ودى اغانى غناها فى حفلات لسه من فتره قصيره وطبعا كالعاده اغانى مش طبيعيه لانه الشاطر عمرو
ودى صورة عمرو على فكره وهو فى بيت عبد الحليم حافظ-الله يرحمه
دى بقى الاغنى الجديده-مش كلها طبعا
انا بعشقها
انا وهى...انا بعشقها ومخبى
وهى كمان مخبيه
انا وهى
يبان قال يعنى مش ليها
وهى كمان مش ليا
انا وهى
محدش راضى يتكلم
وبنعاند ونتألم
ومين فينا اللى ح يسلم
انا؟؟ لا لا لا....هى
كان باين من سلامها
كان باين من سلامها....جايه تغير كلامها
وقفت ادامى ساكته...معرفش جرالها ايه
كان باين من سلامها....جايه تغير كلامها
بتدور ع الكلام...مش عارفه تقولى ايه
انا لا قولت ظالمانى...ولا قلبى ياما ضحى
قولتها واحشانى...وخوفت اجرحها
ويادوب ببص فى عينيها
وخلاص بملس ايديها
لقيتها جوا حضنى
رجعت لمطرحها
لو قادر
لو قادر بص فى عينيا وقوللى عملتلك ايه
مش فاكر مره خلفت بوعد وعدتك بيه
والله ما فاكر منى غير الحنيه عليك
علمتك معنى الحب بشوق وغرام
وماعلمتكش القسوه دى..مش محتاجه علام
اصلك كدا من الاول والقسوه دى فيك
زى الحلم
زى الحلم قابلنى و عدى .... اللى شبكنى و قلبه إرتاح
روحى إتسرقت منى و عدت .... زى الحلم قابلنى و راح
اللى بدور عمرى عليه .... اللى وحشنى كلامى عليه
خدنى معاه للجنه وسابنى أتمنى ..... و فين أنا فين ألاقيه
والاغنيه دى بالذات لحنها لايت اوى وجميل اوى وبيعلق مع الواحد اول ما يسمعه
وطبعا كل الاغانى لحنها قوى اوى ولسه التوزيع ح يخليها حاجه تانيه
وفيه لسه اغانى اكتر...زى اغنية واحلف ليه.....واغنية واقفه جنبى...واغنية قالتلى قول...وخليك معايا...نتعلم ببلاش...حنية الدنيا
بحبك... وغيره
واعذرونى لو الكلمات فيها تغيير لانى كتبتها من حفظى لها

ارسمينى

ليه يا حبيبتى خوفك من بكره
يضيع هوانا ويصبح ذكرى
وليه بتقولى خايفه من يوم ما نشوفش بعض فيه
طيب ازاى تكونى معايا وخايفه؟
وليه مستعجله البعد ليه؟
سيبلى نفسك ومع قلبى احلمى
سيبيلى نفسك ومش راح تندمى
وارسمينى فى كراستك...على سبورة مدرستك..ارسمينى جوا قلبك
ارسمينى جناح طايره بيه
وبعينى تشوفى العالم
وبقوتى تمليكه
ارسمينى بيت...وصورتنا ع الحيط..ارسمينى فرحة قلبك
حبيبتى معايا ح تلاقى الامان والدفا....ح تلاقى الاخلاص والصدق والوفا
ارسمينى ازازة عطرك...نسمه بتطير شعرك....ارسمينى حضن يترمى فيه قلبك
حبيبتى انا همسك ورقة شفايفك...حبيبتى انا فى كل مكان شايفك
ما تسمعيش لقلبك...اسمعى لقلبى انا
ولو حسيتى انك لوحدك..وانى مش معاكى هنا
ارسمينى وكلمينى...قوام ح تلاقينى
بطمن عينيكى...وتطمنى عينى

الله اكبر

محمد ودرديرى...وحنا واسكندر
بدأوا الحرب...بصيحة الله اكبر
الله اكبر
الله اكبر
ورصاصهم بيحصد فى اليهود
عطشان لدمهم وعايز اكتر
وادى محمد فاتح صدره ورشاشه مش ساكت
خلص الرشاش قام كمل بالطنبجه حدوته
على مر اجيال اتقالت واتعادت
وبضهر الطنبجه كسر راس يهودى
وكسر معاها اسطوره مغروره وزايفه
وحنا اثبتلهم ان قلوبنا مش خايفه
بيدخل لوحده ع الدبابه من دول
يقوللها يا انا يانتى
وتسمع صوت انفجارها على طول
ودى رابع دبابه وحنا عمال يصطاد فيهم
مفيش واحده ح تعدى من ايده ولا تفوت
والجندى مجند درديرى سويلم من اسيوط
ماسك المدفع فى ايده كأنه نابوت
مستحلف لأولاد الذين الاعداء
ماهو راجع لداره غير لما
يخللى ولاد الدزمه دول اشلاء
واللى رفع علمنا على ارضنا هو اسكندر
رفعه ومجد الرب وقال الله اكبر
ومعاه قالوا الجنود
الله اكبر
الله اكبر
وبين ساعه واحده وست ساعات
اتولد حلم وكابوس مات
وزغروته طلعت من ام محمد كانها فى عيد
فرحانه بضناها بعد ما راح شهيد
قالولها مات بعد ما شاف العلم مرفوع
مات البطل والتمن دمه المدفوع
مات بعد ما قال الله اكبر بصوت قوى ومسموع
ودرديرى اهو رجع واتجوز بت خاله خميس
واهو البطل جاب بطل زيه اسمه عتريس
حكاله بفخر وهما قاعدين ع الهاويس
عن شجاعة ابوه اللى خللى الشعب يفرح ويتهنى
وجرس الكنيسه دق بيرحب بحنا
وابونا قاله العدرا فرحانه بيك
وعيسى مستنيك ف الجنه
حنا يا بطل من مصر ام الدنيا
جراحك شاهد على نصر ماجاش فى ثانيه
جه بعد صبر...وبتضحية محمد وغيره
جه بعد دم ولادنا اللى اتهدر
لكن الدم اهو طرح ورود وشجر
شجر ابطال وورد انتصار
والشعب اهو لما سمع الخبر
قام وجرح والفرح اتحضر
والحرب خلصت زى ما بدأت
بصيحة عاليه...الله اكبر
الله اكبر
الله اكبر

رباعيات

دى رباعيات كل واحده منها اكيد بفكره معينه..ومعلش جو الرباعيات بيبقى كئيب شويه

بلياتشو وبيلعب بالكوره يمين وشمال

عمال بيضحك فى رجاله وستات وعيال

سألته ومين بيضحكك انت؟قاللى مفيش

اصل الضحك حرام عليا وعلى الناس حلال

وعجبى

غنيت وصوتى فى الفضا سرح

غنيت وصوتى كله شوق وفرح

لكن بصيت مالقتش حبيبتى سامعانى

لقيت قلبى ف عز الغنوه اتجرح

وعجبى

قالتلى ليه مابقتش اشوف صورتى فى عينيك

ولا بتسمع صوتى لما اكون بناديك

قلبك ما بقاش عايش عشانى

ولا انا اللى بغير وعايزه من عيون الناس اخبيك

وعجبى

ياريتنى ما رسمت الحب ليل وقمر وخلاص

ولا كلمتين فى اغانى كلها حب واحساس

صعب توصل حبك لحبيبتك انما

سهل جدا تعيش وحيد وسط الناس

وعجبى

يارب

يارب ياعالم بنيتى
وعالم بدموعى فى خلوتى
وطاعتى ليك وخشيتى
يارب باذنب فى حق نفسى
وارجع طمعان فى نعيمك ياما نفسى
انت عارف كل حاجه عنى
يارب اسمعنى واتقبل منى
متعنى بقوتى وانا شب
وفى هرمى نورلى العين والقلب
بحق سجودى وانا منك قريب
يارب سامحنى دا انا قلبى طيب
ما انت عالم بنيتى
عالم بدموعى فى خلوتى
وطاعتى ليك وخشيتى
ياااااااااااااااااااااااااااااارب

محكمه

!!!!!!محكمه
هس...بس..دخل القاضى
الكل يسكت..وبالحكم يكون راضى
جريوا عليه الناس
دا يقول انا غلبان محتاس
ودا يقول ما بقاش فيه احساس
ودا يقول ما فيش امل خلاص
ودا يقول انا الاول....دا انا سيد الناس
قولنا سكوت..وكله يرجع مكانه
محكمتنا عدل وحياه
مافيش هنا ابن الجناينى ولا فيش سلطان زمانه
كلكم واحد...الهم واحد
والمصير ح يكون واحد...لله الواحد
انت قوللى مالك..قول
احكى بصدق ومن قلبك على طول
انا صياد مافيش فى ايدى غير شبكه
بحرى عليا بخيل ما لقتش فيه سمكه
وع الشط قعدت اندب بدموعى حظى
ماحنش برضه عليا ولا لقيت منه شفقه
:القاضى
بحر الدموع نار...والصيد فيه ممنوع
الغريق فيه مفقود ولو يصرخ مش مسموع
من امتى البحر بيدى من غير ما ياخد
اسعى وجاهد وقيد فى وسط الريح شموع

وانا فارس الليل راكب حصانه
لو يقابلنى سد بايديا اكسر بيبانه
ساعة الحظ ماافوتهاش لكن
ماليش صاحب يضحى عشانى واموت نفسى عشانه
:القاضى
صاحبك هو ضعفك ادام هواك
لا هو ح يبقالك ولا ح تلقى فيه دواك
خليك راجل وحط فى عقلك ربك ووطنك
تصبح بطل ونسيم الجنه يعطر دماك

وانا ضحكتى خلابه مالهاش حل
عايزه اطير واطير ولا يوم ح امل
لكن مش مطمنه عايز امسك فى ايد
قوللى يا قاضى اعمل ايه وايه الحل؟
:القاضى
جواكى طفل صغير محتاج يتكلم
عايز يجرى ويلعب ويخاف لو يتألم
طاوعينى وخللى قلبى يسلم
لقلب يشيل همومك ويعشق عيونك
ساعتها كل الناس من عشقك ح تتعلم

وانا ع الكمنجه غنيت لكتير احبه وعاشقين
وعلى الحانى رقصوا ليالى وغنوا سنين
اشمعنى انا حبيبتى دايما حلم مش حقيقه
منايا تيجى وتسمع فى حضنى اغانى ماسمعهاش بنى ءادمين
:القاضى
كل قلب وله حبيب ساكن فوق عند القمر
فى يوم ح ينزل ينور قلبه بامر القدر
نصيحه منى اسعد وجمع بين القلوب
وجزاءك حبيب ملاك....جماله عمره ماخطر
هو دا كان القرار...بعد ما سمعنا منكوا الاسرار
الدور عليكوا بقى...يا تعيشوا ف جنه يا تعيشوا فى نار

اخت القمر

اهداء الى انسانه اصبحت بين يوم وليله اخت.. انسانه رقيقه الى ابعد الحدود..تكلمها تحس بالبرائه والدفاء..وتحس ان
مافيش حواجز ولا حدود بينكوا..اهداء الى اختى هدى
فى ليله حلوه جميله....ما كنش ابدا على بالى
القاها ونحكى ونشكى...مر حالها وحالى
حكالى قلبها عن شوقه وصبره...عن طيبته وسهره...عن كل دقه فى عمره
وحكتلى رقتها عنها
قالتلى تنهيده منها
كلام وقصص وخيال
حواديت واحلام وموال
دا هى بريئه شقيه
رقيقه كما الحوريه
صوتها دافى...بيغنى اغنيه
لقيتنى بقولها بصدق وحنيه
انتى اخت القمر
شباكك اعلى من القمر
وحيده مستنيه
حد يستاهل يطولك من البشر
لكن خلاص ماعدتيش لوحدك
واسمحيلى ادق الباب فوق عندك
وادخل بعد اذنك
امسح دمعتك
اشاركك ضحتك
اخللى الاحلام دنيتك
وصدقينى لما قولتلك
انتى اخت القمر
شباكك اعلى من القمر
وحيده مستنيه
حد يستاهل يطولك من البشر

باصص لفوق

كلمة بحبك نفسى اقولها...وراضى بسكوتك
خايف بعدها مااسمعش..حتى صوتك
خايف تفهميها...ترفضيها وماتبقيش معايا
خايف مااقولهاش...ويموت حبى جوايا
عايز اقولها واثبتها...عايزك تحسى قيمتها
عايز كل الكون يسمعنى وانا بقولها
وعايز اكون لوحدى وانا منك بسمعها
دايما باصصلك فوق
واحلم من غير ماافوق
ومن غير ما اتكلم تنزل دمعه
اصلى بشوفك بعيده ومش سامعه
باصص لفوق مستنى بس اشوفك
اصلك فى ضلام الليل شمعه
باصص لفوق وخلاص ح ادنه عليكى
صوت دقات قلبى تعلى وتغطى على صوتى
امسك نفسى وانده من تانى عليكى
كلمة بحبك تخرج تكسر سكوتى
لكن من تانى ابص لفوق
من غير ما اتكلم تنزل دمعه
اصلى بشوفك بعيده ومش سامعه

قلبى2

اتكلم ولا اكسر بقلبى كالعاده
لكن قلبى صرخ وقال بزياده
بزياده كتمان ورحمان
بزياده دا انا للحب عطشان
مش كفايه اول مره احب...كسرتنى
وف ثوانى نسيتها ولوحدى سيبتنى
المره دى لأ...بعد ما شجعتنى
مستحيل ارجع مكسور تانى
ولو ح يكون اخر يوم فى زمانى
ح احبها واحبها..وافضل احبها
صدقنى انا سامع اهو نداء قلبها
سكت قلبى عن كلامى وجه الدور عليا
مالقتش حل يخللى الالم يلين
حل يخللى قلبى يبطل انين
غير انى اغرس فى قلبى السكين

قلبى

انا قلبى طير جناحه مكسور
يقدر بخياله يعدى بحور
مش كتير عينه بتدمع...ولا اهاته فى الفضا بتسمع
بيشكى حاله لحاله...ويقول حاضر ومعلش
يستحمل ويقول وماله...ويعود مشتاق للعش
يسهر فيه مهموم...مايجيله ابدا نوم
بيدور فى عز الضلام على طاقة نور
انا قلبى طير بجناح مكسور
ييجى ينام وعينه فى السما...يحلم وفى عز الحلم يقوم
يفتكر الحلم واقع انما...انكتب عليه الوهم مصير محتوم
بس يقول ما يهمش...الاحلام ما تضرش
ويحلم تانى نفس الحلم بكل غرور
انا قلبى طير بجناح مكسور
وفى يوم لقى الحبيبه ودقلها القلب...حبها حب ما حبوش حد
ومشى يقول خلاص ضحكتلى الدنيا...رجع ياعينى لقى عشه اتهد
سكت شويه...وبص لفوق...وصرخ
ليه مات الامل...ليه جدار الفرح اتشرخ
نسيت انا مين واسمى تاه بين السطور
انا قلبى طير جناحه مكسور
انا قلبى طير جناحه مكسور

ملحمة كلام العيون

فعلا ملحمه...واحتمال يكون دا اكبر موضوع ليا...والفكره تستاهل اكتر...الفكره بجد خطيره بدأتها بكلام العيون 1
وبعدها كلام العيون 2
وبعدها
رد عليا حازم صاحبى.......ZooOoom
بكلام العيون3
بصراحه كان عنده حق وثبتنى...الى حد ما
لكن رديت عليه بكلام العيون4
قولت اكتب كلام العيون1 واكتبهم تحت بعض بالترتيب عشان تعيشوا معايا شويه التجربه وتفهموا الفكره واد ايه هى خطيره
بالمناسبه مش عايز اخوض فى تفاصيل ...مع انها مهمه جدا لكن دى خصوصيات وكمان مش عايز ارغى
كلام العيون1
اه لو العيون بتتكلم...والقلب بيعرف يسلم
كان حالى بقى ماهو حالى...ولا كنت يوم اتألم
دا الشوق مش محتاج لرسول
محتاج لنظرات بس تتكلم وتقول
تقول سهران بفكر فيا وفيكى
وباتمنى انام عشان احلم بيكى
كل شىء فيكى شدنى
كلامك...طريقتك...حتى مشيتك...ونظرة حنان فى عينيكى
اه لو العيون بتتكلم..والقلب بيعرف يسلم
كان حالى بقى ماهو حالى...ولا كنت يوم اتألم
واقف مع الناس بس مش معاهم
باصص فى عيونك وتايه معاهم
بحاول اعبر عن شوقى واعجابى
وادور على نظرات منك تجاوب جوابى
وبسرعه ادارى من خوفى منهم
مش خايف عليا..لأ...خايف عليكى من كلامهم
اه لو العيون بتتكلم...والقلب بيعرف يسلم
كان حالى بقى ماهو حالى...ولا كنت يوم اتألم
لو اطول واجى اقولك على اللى بيا
وما احرمش نفسى منك ثانيه
اوقات اشوف ابتسامتك اقول خلاص بقيتى ليا
واقربلك واهب قلبى لقلبك هديه
واغمض عينياوامد ايديا
والا قينا فى دنيا تانيه
نحكى ونضحك والضحكه تملى الدنيا
وفجأه افوق م الحلم
والحلم يضيع فى ثانيه
اااااااه لو العيون بتتكلم...والقلب بيعرف يسلم
كان حالى بقى ماهو حالى...ولا كنت يوم اتألم
اااااااه لو العيون بتتكلم...والقلب بيعرف يسلم
كان حالى بقى ماهو حالى...ولا كنت يوم اتألم
ودى بقى كلام العيون2 تعتبر مكمله ووصف لاحداث ومواقف مترتبه على كلام العيون1
كلام العيون2
كل ما اشوفها...احس انى عارفها من زمان
واحس عيونها...شايفانى ومعايا فى كل مكان
ولو فى يوم تحرمنى من نظره
ما احسبوش من عمرى بالمره
واسأل ليه هى بتعمل كده
وهو انا عادى بالنسبه لها كده
وليه اربط نفسى بعيون قسيه
تحن يوم وتفوتنى تايه ميه
اه لو العيون بتتكلم...والقلب بيعرف يسلم
كان حالى بقى ماهو حالى...ولاكنت يوم اتألم
حاولت فى يوم ابوح بسرى اليها
جيت اتكلم خلاص وعينيا فى عينيها
لقيتها مرت زى النسمه ماحستش بيها
لكن حسيت انها تقريبا قالت حاجه
قالت بهمسة عطورها...انا ليك محتاجه
تعالى نبعد من هنا لوحدنا
عايزه السما والنجوم بس يشهدوا حبنا
اه لو العيون بتتكلم...والقلب بيعرف يسلم
كان حالى بقى ماهو حالى...ولا كنت يوم اتألم
وارجع تانى واقول دا كله وهم وسراب
معقول حاسه بيا وبتدوق زيي العذاب
معقول جواها نفس الشوق والحب
معقول من سكات القلب يحب القلب
ونخللى العيون قوام تفضحنا
وبنقصد تفضحنا عشان تريحنا
لكن بنخاف ما تقولش كل الكلام
اصل النظره لمحه وياريتها ساعات وايام
اه لو العيون بتتكلم...والقلب بيعرف يسلم
كان حالى بقى ماهو حالى...ولا كنت يوم اتألم
اخر اربع سطور كتبت عن فكره النظره واد ايه هى قصيره واد ايه بنجاول فى الكسر من الثانيه نقول كلام كتير وبعد ما نمشى نقول ياخساره ما قولتش...او انا حاسس كأنى ما قولتش حاجه عشان كدا اتمنيت تكون النظره مش ثانيه وانها تكون ساعات وايان...بمعنى اصح انى اقدر اشوف الحبيبه ادامى كل وقت...وبلاش اقول مين اللى اوحالى بالفكره دى ما كان بيكلمنى وهو مشتاق وحالته صعبه...اقول؟ ولا ح تخبى ديلك يا عصفور؟؟
خلينا فى كلام العصفور...قصدى حازم
رد عليا بكلام جميل جدا...اثبتلى انه بيكتب احسن منى كقافيه ووزن وطبعا افكار.وبدأ كلامه بدايه قويه جدا كانت تكفى تهد اللى فات وتكفى اى كلام بعد كدا..قال ايه بقى العصفور...يووووه قصدى حازم
كلام العيون3
كلام العيون يا صاحبى لا بيودى ولا بيجيب
لو مره قلبك دق....روح قلله انت حبيب
انت اللى عايزك منى قريب
انت اللى شاغل افكارى...وعنى ولا يوم هتغيب
واوعى تقول مشتاق بعينيك
هتفضل تدوق الويل بايدك
بدايته سهر وتعشق القمر....فى الاصل حجر ونوره مش ليك
دا نوره للى يحب فى نوره....من غير خوف ولا شوق تعذيب
وتلقى لحد ما يوصل شوقك...فى السكه تاخده الريح ويغيب
وياعينى فى الهوا تطير اشواقنا
وياعالم مين راح يصدقنا
والبعد ناره بتحرقنا
وجروحه مالها طبيب
دا كلام العيون يا صاحبى...لا بيودى ولا بيجيب
ادى كلام حازم..والله عندك حق يابنى...ليه العذاب دا كله...ما تروح وتتكلم...بس وقفت وقولت مع ان كلامك صح بس انا عندى الرد ..اه نسيت اقول كلمة ندا...يعنى نداء عشان فيه ناس بتقراها غلط
كلام العيون4
من امتى كان الحب راحه؟...دا اللى بيهوى اسير فى اهواه
واه لو تعشق عيون جراحه....تفضل عايش بين نار واه
لو بايديا يا صاحبى كنت اصرخ واقول
بحبك والله بحبك..وانا لك على طول
لكن قوللى
تقدر تعمل كدا؟
من غير ما تسمع من دا ودا
تجريح وملامه...وكلام ياما...وهمسك يسمعوه ندا
دا الناس همها توشى بينا
حتى القسوه كمان من اهالينا
بيقولوا علينا قال مانعرفش الحب
اصلنا لسه صغار..ماعندناش قلب
بعد دا كله قوللى
فى ايدينا ايه غير كلام العيون
صوته بيصرخ...بيشق السكون
بيلمس القلب...بيسهر الجفون
فى ايدينا ايه بس غير كلام العيون
وان كان ع القمر اهو بنشوف فيه الحبيب
سهران بيوعدنا...ان اللقا قريب
وان كان ع القمر اهو وحيد برضه وحيد فى سماه
بيناجى حبيبه من بعيد...بيتمنى يكون هناك معاه
استحمل بقى يمكن يلين الحجر
استحمل بقى ليالى السهر
استحمل ولا ح تكون احسن من القمر؟
بعد دا كله قوللى
فى ايدينا ايه غير كلام العيون
صوته بيصرخ...بيشق السكون
بيلمس القلب...بيسهر الجفون
فى ايدينا ايه بس غير كلام العيون
ادى كلام العيون...وادى اللى بيعمله فينا خلانا محتارين ولا عارفين راسنا من رجلينا
توب علينا بقى يارب من الشغلانه دى...ههههههههههههههههه

اقر انا المذكور اعلاه

تاج جميل بعتته ليا دودى ربنا يكرمها بحق جاه النبى
هل انت راض عن مدونتك شكلا وموضوعا؟
الشكل ما يهمنيش بس عاجبنى لانى بحب لون الازرق اوى اوى اما المضمون نفسى يعجبنى لان تقريبا ما فيش حاجه بكتبها الاوبحس انى عايز اكتب احسن منها بس فى نفس الوقت بحس ان كل كلمه هى بنت من بناتى وبغير عليها اوى وبعشقها
هل تعلم اسرتك الصغيره بامر مدزنتك؟
لا ما يعرفوش زى حاجات كتير اوى فى حياتى ما يعرفوهاش بس عارفين انى بكتب ومش بحاول اعرف
رأيهم فى اى حاجه يقروها بالصدفه
هل تجد حرجا فى ان تخبر صديقا عن مدونتك؟هل تعتبرها امر خاصا بك ؟
بالعكس انا بكون مهمتم جدا برأيهم فى اى حاجه بكتبها لكن بطلب ان ماحدش يعمل كومينت
هل تعتبرها امرا خاص؟
ان كان هناك سرا تخفيه فلم تخبر الناس ان لديك ما تخفيه
هل تسببت المدونات بتغير ايجابى لافكارك؟ اعطنى مثال فى حاله الاجابه بنعم؟
بالتأكيد ...ومش ح اكمل لانى ما جاوبتش بنعم
يلا مش مشكله ح اجاوب وخلاص لانى اكتسبت معرفه بناس دامغها نضيفه جدا ومحتاج اوى لدماغ نضيفه افهمها واتجاوب معاها
هل تكتفى بفتح صفحات من يعقبون بردود فى مدونتك ام تسعى لاكتشاف المزيد؟
الحقيقه كنت بخاف اعمل تعقيب عند اى حد عشان مش عايز ناس كتير تدخل عندى مش عارف ليه بفكر كدا بس يمكن عشان دايما بحس انى بكتب لنفسى اوى وعامل البلوج دا زى مذكرات ليا بس بفرح اوى انى بقراه التدوينات التانيه ومش بسعى لاكتشاف المزيد
ماذا يعنى لك عداد الزوار؟هل تهتم بوضعه فى مدونتك؟
لا مش بهتم وتقريبا اجابة السؤال اللى فات تنفع هنا كمان
هل حاولت تخيل شكل اصدقائك المدونين؟
..يابيه عيب الحاجات دى انا بتكسف..
.الحقيقه ان شكل صاحب كل تدوينه بيترسم بين السطور و بدل النقط ع الحروف بشوف الوجوه بتضحك وتبكى وتزعل وتفرح وتنادى باعلى صوت..وكلامها يملى السكوت
هل ترى فائده حقيقيه للتدوين
اكيد..التدوينه دى سفير ليا عند الناس اللى بتدخل وتقراها وزى ما دايما بقول انها حاجه كدا زى ما بكتب على صخره على البحر ..افتكرنى يابحر..ادينى بكتب ع النت..حاجه تكنولوبيا من جهه وتكنوباميه من جهه اخرى
هل تشعر ان مجتمع المدونين مجتمع منفصل عن العالم المحيط بك ام متفاعل مع احداثه؟
ايه معنى الانفصال؟ بحس انه منفصل لان فيه ناس كتير ع النت وما تعرفش حاجه اسمها تدوين اصلا..وبالمعنى التانى للانفصال لا طبعا هو مش منفصل..لاننا شباب بيفكر وبينفعل وبيدون كل دا
هل يزعجك وجود نقد بمدونتك ام تشعر انه ظاهره صحيه؟
ههههههه..حاجه غريبه فى شخصيتى ان مش بحب حد يقولى كلمة مدح بحب دايما يتقالى نقد عشان اعرف ايه الخطأ الخفى اللى مش واخد بالى منه او بمعنى اكثر خباثه هو انى عشان اثبتله انه فهم غلط وانى بفهم برضه اكتر منه..هههههه
هل تخاف من بعض المدونات السياسيه وتتحاشاها؟ هل صدمك اعتقال بعض المدونين ؟
والله العظيم اعتقلوا بجد؟ شد يابنى الجراج واقفل المحل وقول يا فكييييييييك..لا مش بحب ادخل عليها لان شايف ان السياسه كلام كتيير ع الفاضى مع بتكلم فيها كتير وفعلا مصدوم من حكاية الاعتقال دى
هل فكرت فى مصير مدونتك حال وفاتك؟
انا عامل المدونه دى بقى بالذات عشان لما بعد موتى...اهىء اهىء...بكره الحاجات دى تباع الملايين ويا سلام بقى لو حد وقع على المسودات والهوامش بتاعتى دى بقى بالمليارات..دا مش دى ثقه فى النفس ...دى غرور...
اخر سؤال : تحب تسمع اغنيه ايه – بلاش صيغه امال فهمى دى – ما الاغنيه التى تحب وضع اللينك الخاص بها فى مدونتك؟
الله على السؤال....ابوس ايد اى حد يقرا المدونه دى ان يبعث الى بطريقة وضع اغنيه على البلوج لانى عايز احط اغنيتى اللى بحس وانا بسمعها ان هشان عباس بيوشوشنى بيها...هى اغنيه ليالى الشوق من البوم ياليله
اكتب اسماء خمسه مدونين ليقوموا بهذا الاستقصاء بعدك؟
مش عارف ابعتها تانى ولا لأ بس اكيد لأ...لكن اقول لدودى ميرسى كتييير

سنه

فاتت سنه على اجمل حلم حلمته فى حياتى...صحيت خلاص منه بس لسه عايش عليه...واقول للى كان معايا فى الحلم..كل سنه وانت طيب
سنه...بالظبط سنه
مرت سنه
اجمل واسعد سنه
ياريتها كانت اكتر من سنه
بحتفل بيها لوحدى انا...وحدى بعد قرار بعدنا
تشهد ايامها الليله...دلوقت...هنا
على حزننا وفرحنا
بكانا وضحكنا
كانت بس سنه...ياريتها اكتر من سنه
اجمل واسعد سنه
اتعلم فيها شعورنا وحسنا
معانى كانت غايبه عننا
دا بعد ما صبرنا...وحلمنا بالفرح والهنا
لقينا بعض...ارتحنا لبعض..وعدنا بعض
وادى اخرة صبرنا...انتهى حلمنا...بعد سنه
كانت بس سنه
ياريتها اكتر من سنه
اجمل واسعد سنه

حاول تفتكرنى

ياعيون حبيبتى افتكروا...صورتى وانا دايب فيكوا
بلاش فى يوم تنسوا...وعودى اللى كانت ليكوا
بلاش فى يوم تشوفونى...زى اى حد حواليكوا

ويا ايدين حبيبتى افتكروا...لهفة ايديا تيجى تسلم اليكوا
بلاش فى يوم تحسوا...ان الشوق مابقاش ماليكوا
بلاش فى يوم تخونونى...وتقولوا يومين وعدوا عليكوا

وياذكريات مع حبيبتى افتكروا...ايام كانت حلوه بيكوا
بلاش فى يوم تسمحولها...بعيد عن قلبها تخبيكوا
ولو جت فى يوم تبيعكوا...انا بعمرى اشتريكوا

كلام فى الحب

:لو حسيت انك بتحب...او فجأه دق القلب...امتى تقول دا فعلا حب
لما تحس حبيبك خيال دايما جنبك
لما تحسه حاسس كل دقه فى قلبك
حبيبك دايما وياك مهما تكون
شايفه وشايفك...سامعه وسامعك
مالى عليك الكون
حاسس بيه وسط اصحابك...قاعد وياك
بيضحك لما تضحك...وا ما بتمشى
ماشى معاك
حاسس خطاويه مش بتفارق ابدا خطاويك
وانه فى كل طريق جاى بيجرى عليك
حبيبك دايما وياك مهما تكون
شايفه وشايفك...سامعه وسامعك
مالى عليك الكون
لما تحس انه بيسمع لما تيجى تحكى
وحاسس قلبه بيتقطع لما بتبكى
كل كلمه تقولها بتكون قاصده بيها
ولو غنوه حلوه بتسمعها
ولصورته تسهر تغنيها
بتحب نفسك عشان دايبه فيه
وتعيش ايامك وتموت فى لياليه
حبيبك دايما وياك مهما تكون
شايفه وشايفك...سامعه وسامعك
مالى عليك الكون

زى الليله

دى اغنيه لمحمد فؤاد من البوم كبر الغرام...فكرتها جميله وكلماتها اجمل...ما كنتش اتخيل انى ح امشى اغنيها لوحدى بعد صلاة الفجر وانا حاسسها اوى كدا , ماكنتش فاكر ان كلمه فيها...كل كلمه بجد بتعبر اوى اوى
زى الليله قابلتها
زى الليله عرفتها
واتولدت جوايا مشاعر لقيتنى بحبها
كانت اول حب فى عمرى
كانت اهلى وكل اصحابى
كانت عمرى
كنت بحس انها من دمى
اختى
حبيبتى
ماكنتش عارف ان هوانا ممكن يتحير جوانا
ويضيع قلبى اللى هواها وترضى ببعدها
زى الليله قابلتها
زى الليله عرفتها

حكايتى

دى حكايتى...كتبتها فى لحظه...بالظبط زى ما بدأت فى لحظه وانتهت فى لحظه...بس ذكراها ما بتتنسيش ومهما حكيت عن حكايتى الحكايات ما تنتهيش
انا طلعتلى عروسة البحر ليلة ما كنت قاعد ع الشط
لقيت جمالها عجيب ودوبت فى كلام كان كله صمت
من يومها وقلبى من مكانه اتشال ما اتحط
حبيت عشانها ليالى السهر واتمنيت لو عمرى كله سهرت
ما خوفتش من البعد ابدا ولا مره فيه فكرت
وفضل قلبى يلح عليا...يلا بسرعه...وراها نط
رميت نفسى فى عالمها ولقيتنى بغرق بموت
بس عشان كانت معايا ما كنتش هايب الموت
خرجتنى م الميه وصرخت فيا ابعد عنى...روح ما تجيش
ازاى عايز تموت فيا وعايز معايا تعيش
ارحم نفسك عشان خاطرى وياريت ما تحبنيش
بكيت لها واترجيتها تاخدنى تانى لدنيتها
رفضت دموعى واختفت عنى فى ساعتها
ومارضاش نور القمر يخلينى اشوفها ولو من بعيد
مارضاش نور القمر ينور ضلام لياليا من بعد ما بقيت وحيد
مارضاش نور القمر يعوض قلبى عن فرحته ويمدلى الايد
ياخساره ياعروسة البحر...ياخساره يا ليالى السهر
يا خساره خلصت حكايتى...يا خساره يا نور القمر

كلام العيون

اه لو العيون بتتكلم...والقلب بيعرف يسلم
كان حالى بقى ماهو حالى...ولا كنت يوم اتألم
دا الشوق مش محتاج لرسول
محتاج لنظرات بس تتكلم وتقول
تقول سهران بفكر فيا وفيكى
وباتمنى انام عشان احلم بيكى
كل شىء فيكى شدنى
كلامك...طريقتك...حتى مشيتك...ونظرة حنان فى عينيكى
اه لو العيون بتتكلم..والقلب بيعرف يسلم
كان حالى بقى ماهو حالى...ولا كنت يوم اتألم
واقف مع الناس بس مش معاهم
باصص فى عيونك وتايه معاهم
بحاول اعبر عن شوقى واعجابى
وادور على نظرات منك تجاوب جوابى
وبسرعه ادارى من خوفى منهم
مش خايف عليا..لأ...خايف عليكى من كلامهم
اه لو العيون بتتكلم...والقلب بيعرف يسلم
كان حالى بقى ماهو حالى...ولا كنت يوم اتألم
لو اطول واجى اقولك على اللى بيا
وما احرمش نفسى منك ثانيه
اوقات اشوف ابتسامتك اقول خلاص بقيتى ليا
واقربلك واهب قلبى لقلبك هديه
واغمض عينيا
وامد ايديا
ولا قينا فى دنيا تانيه
نحكى ونضحك والضحكه تملى الدنيا
وفجأه افوق م الحلم
والحلم يضيع فى ثانيه
اااااااه لو العيون بتتكلم...والقلب بيعرف يسلم
كان حالى بقى ماهو حالى...ولا كنت يوم اتألم
اااااااه لو العيون بتتكلم...والقلب بيعرف يسلم
كان حالى بقى ماهو حالى...ولا كنت يوم اتألم

shape of my heart

performed by:sting.......a song of my character
He deals the cards as a meditation
And those he plays never suspect
He doesn't play for the money he wins
He doesn't play for respect
He deals the cards to find the answer.....The sacred geometry of chance
The hidden law of probable outcome
The numbers lead a dance
I know that the spades are the swords of a soldier
I know that the clubs are weapons of war
I know that diamonds mean money for this art
But that's not the shape of my heart
He may play the jack of diamonds
He may lay the queen of spades
He may conceal a king in his hand
While the memory of it fades
But that's not the shape of my heart
That's not the shape, the shape of my heart
And if I told you that I lovedyou.....You'd maybe think there's something wrong
I'm not a man of too many faces.....
The mask I wear is one
Those who speak know nothing
And find out to their cost
Like those who curse their luck in too many places
And those who fear are lost
I know that the spades are the swords of a soldier
I know that the clubs are weapons of war
I know that diamonds mean money for this art
But that's not the shape of my heart
That's not the shape of my heart

ذكريات

مين كان يقدر يتصور...ايامنا تعدى قوام

ومهما ع الاسباب ح ندور...ما يفيدش اى كلام

ياريت الذكرى كانت صوره ولا ورده فى كتاب

ياريت الذكرى كانت قلب فى سلسله ولا جواب

دا الذكرى احساس...وماضى ما يتنسيش فى حياة انسان

وضحكه لما تفتكر موقف حصل ايام زمان

الذكرى شوق لهمسه من شفايف وكلام بالوعود مليان

الذكرى طيف وملامح داير تدور عليهم فى كل مكان

فى عيون كل انسان

لو كان دا عذاب يبقى قلبى مش ممكن يقسى

ولو كان دا وفاء يبقى مستحيل يا حبيبى انسى

لو ح انسى...ح انسى عشانك

وعشانك برضه ح افضل فاكر

واياك اكون جزء من احزانك

دا انا مخلوق لفرحك....فاكر؟

دى كانت كلمتى ليك....قبل ما يجور الزمان عليا وعليك

بس انا لسه على وعدى لعينيك...حتى فى احلامى يا حبيبى مش ناسيك

رساله

كم جميل لو بقينا اصدقاء...ان كل امرأة تحتاج الى كف صديق
كن صديقى...كن صديقى
رواياتى صغيره...واهتماماتى صغيره
وطموحى ان امشى ساعات معك...تحت المطر
عندما يسكننى الحزن ويبكينى الوتر
انا محتاجة جدا لميناء سلام وانا متعبة من قصص العشق واخبار الغرام
كن صديقى....كن صديقى
ليس فى الامر انتقاص للرجوله
غير ان الشرقى لا يرضى بدور غير ادوار البطوله
الان....هل ادركتى واقعى؟....هل ادركتى دوافعى؟..هل عرفت لماذا قولتها.....احبك؟فانا لا اقبل بغيرى بعقلك وقلبك..لا تريين سواى...اسكن روحك واحلامك وافكارك...اريد ان اكون حياتك...اريد ان اكون كل شىء...تماما مثلما انك كل شىء لى
لا استطيع تحمل فكرة كونك لغيرى او ان اكون مجرد صديق او اخ...لن اتحمل يوما ستأتيننى لتحكى لى عن غيرى ويطول حديثك عنه فألمح فى عينيك صورته
ياليتنى ما وجدت فيكى مرادى ولا امالى...وياليت عقلى يعترف بالمستحيل وان البعد والمسافة بيننا كبيره ...ان الحساسيه التى تحاصر مشاعرنا اصبحت هم ثقيل على كل من يريد ان يبوح بشعوره..او يحاول مجرد المحاوله ان يظهره فى كلامه او على وجهه
وكانت اللحظه..لا اذكر ان كانت مجرد لحظه...تلك التى اختلطت فيها الافكار والمشاعر وحينها اتخذت قرارى...ثم اتضحت الرؤيه لاجد نفسى وقد اخطأت...ولكنى لم اخطىء...لا بل اخطأت..لا اعلم...لقد تعبت وارهقتنى الحيره
اذا كنت لم اخطىء...فانا فلم اخطىء لانى صارحتك بحبى...ليس هذا بذنب....وحاولت ان افهمك حقيقة ما اعيش فيه وان اشركك فى تفكيرى ولكن لماذا احبتتك؟ لانى دائما ما ابحث عن الجمال والكمال والصدق..فهم عندى اولويات..اذا انتقص منهم شىء فلا اقبل عندها الامر برمته
وهاقد وجدتهم جميعا فيكى ووجدت ايضا صورة تكررت فى احلامى وشطحات خيالى..وجدت الطفوله ببهجتها والشعور بالحنان والاطمئنان...ووجدت العقل والرزانه بجديتها ومسؤليتها...عاد الى الاحساس بالاشياء بعد ان فقدته...اصبحت اشعر بالمتعه والمراره...بالرضا والغضب...بالراحة والالم...عادت احاسيسى الى جسدى وقلبى...لماذا قولتها اذن؟لان قلبى اصبح مفتوح لك لا اخفى شيئا عنك ويالى من غبى لا احسب حساب المستقبل...فقد سلمت مفاتيح قلبى لك...وقد ضرنى هذا كل الضرر فبعدما احببتك...وشى بى قلبى واعترف لسانى...احبك
وان كنت قد اخطأت ففيما اخطأت؟هل انى كما قلت لا اعترف بالمستحيل ولا بالبعد والمسافات؟فأنا عندما اريد شيئا لا اهدأ حتى اجده وابقى على حالى تجاهه من حب و حاجة وتقدير..على عكس الناس التى سرعان ماتنسى ما كانوا يحاربون من اجله بعد ان وجدوا ما يريدون وضاعت متعة الحاجه الى الاشياء ونقصها..بل وتبحث عن غيرها
خيالى واحلامى وطموحاتى مثل سماء الطيور...لا حدود لها..غير انى ارضى احيانا بالقليل والمقسوم..اذن لماذا اخطأت؟اااااه لقد عرفت فأنا يا صغيرتى قد ظلمتك...اغتلت لحظه لكم هى جميله فى حياة كل منا لحظه يسمع فيها من يحب ممن احب واتحب لكلمة سحرها لا يوصف...كلمة كالدواء...اغتلتها فيكى صغيرى وضيعت اجمل لحظه لا ينساها القلب ولا العقل...لقد كسرت بيدى جناح العصفور وحبسته بقفص من دون ماء ولا هواء....ودفعتنى انانيتى الى قتل احلامك مع سبق الاصرار والترصد والغباء
انا لا ابالغ..فهذا ذنب لن اغفره لنفسى...هذا هو عذاب الضمير
صديقتى...صغيرتى..حبيبتى..هل تتصورين ما احمله من ذنب؟هل تتصورين ما يفعله ضميرى بى كلما خلوت بنفسى؟لطالما وودت ان اخفى حقيقة ذنبى عنك حتى لا تكرهينى وتدركى مدى انانيتى ومدى خطئى الذى ستدفعى انتى ثمنه...لكن ها انا اعترف واريد القصاص حتى ارتاح....اريد البعد الفراق ولا اطيقهما...اريد الرضا وراحة الضمير ولا اطولهما
صديقتى...صغيرتى...حبيبتى..لقد غطت دموعى سطورى الان...ولا اسطتيع ان اكمل او اوصف ما بقى داخلى..وهو كثير وثقيل
صديقتى..صغيرتى...حبيبتى...سامحينى ولا تنسينى...فكرى بغيرى....احبى واكرهى...واحكى لى... فانا صديقكى....اخيكى...ولكنك حبيبتى....نعم حبيبتى
taken from my private note.
written on 2\12\2005

بالعربى...ماحدش يستاهل

: اغنيه غناها عمرو دياب فى حفله بتقول ايه
تعبت انا...تعبت انا
ومين ماتعبش فينا
تعبت انا...تعبت انا
ياريت ما تعييبش فينا
تجربه وعدت....واتعدت من ضمن تجاربى
ورجوعها مابقاش بالساهل
تجربه وعدت...وانا قولت وبتكلم عربى
بالعربى ماحدش يستاهل
تعبت انا...تعبت انا
انا يا تاعبنى معاك
ح انساك
ح انسى كل ايامك
ما انا ماطلعش قلبى ملاك
مش دا برضه كلامك؟؟
تعبت انا...تعبت انا
تجربه وعدت...واتعدت من ضمن تجاربى
ورجوعها مابقاش بالساهل
تجربه وعدت...وانا قولت وبتكلم عربى
بالعربى ماحدش يستاهل
الاغنيه عاجبانى مش اكتر.....عاجبانى جدا

انا وهى وصاحبى

دورت كتير ولقيتك ف النهايه
اجمل وارق بنت وعيونك حكايه
وبدأ شىء باتجاهك يكبر جوايا
وبقيتى قلبى اللى مش معايا
ف يوم ما شوفت بعينيا نورك بيملى قلبى
ف يوم ماقررت اتكلم وتتكلمى وكفايه نخبى
ورايح اجاوب على اسئلة عينيكى الجنان
واقول ايوه بحبك وانجح فى الامتحان
وماشى على وشى فرحتى...قابلت صاحبى فى سكتى
بيقول جاى احكيلك عن حبيبتى
نويت خلاص تبقى لاخر عمرى شريكتى
قعد يحكى وكل ما يحكى الخوف يدق قلبى بزياده
عجيبه؟...بيوصفها كأنك هى...وانه شاف فيها معنى السعاده
اتاريه بيفكر فيكى
اعز اصحابى مغرم بيكى
لحد ما نطق اسمك بحنيه وهيام
والكلام طالع من قلبه مش اى كلام
دا فعلا حبه ليكى مش كذب ولا اوهام
وحبك فرحته بعد ما ظلمته الايام
انا سكت وهو عمال يعيد ويزيد
وانا قال يعنى فرحان ومن جوه احساس بألم شديد
خبيت عنه دمعتى ورجعت تانى فى سكتى
يوم ميلاد قرار حبك...بقى فيه قرار تانى
انسى كلمة بحبك...وامشى فى طريق تانى
وليه طريق تانى
ما انا افضل فى طريقى اللى زهقت منه حقيقى
طول عمرى ماشى فيه زى ماهو لحد ما كرهته
ياريتنى عشانه ما شوفتك وياريتنى عشانك ما عرفته
نهايته ح ادعيلك...وادعى تنسى وتسامحينى من كل قلبك
وصاحبى اسمعيله واعى تقوليله انى ف يوم كنت بحبك

كلام الليل

حاسس ان كلامى المره دى تقيل وممكن يكون متكرر وان معناه غريب..بس هو عباره شرارة تصادم فكرتين ....الفكره الاولى اتناقشت فيها مع اعز اصدقائى عن حاجات بسيطه وجميله واعتقد انها اساسيه وممكن تكون محروم او ممنوع منها بسبب ظروف...ومن عجائب القدر ان الظروف دى بتحسدنا عليها الناس..لا والاهم اننا المفروض نبعد عن الحاجات دى وننساها خاااااااالص...عشان ما نتعذبش اكتر من كدا....زماعلينا الفكره التانيه بالنسبه لى انا عن الليل وازاى انه بجد اصبح سجن بالنسبه لى بس سجن بمزاجى...مش عارف ازاى ...بس هو كدا وقاللك ايه بقى
باصص للسما وشايف نجوم...جمالها للعيون دليل
كل ما اختار نجمه لقلبى يخفيها عنى ضلام الليل
عشان كدا قولت اصاحب الليل يمكن انول الرضا
ويجود ويحن عليا بنجمه كدا ولا كدا
طلع الضلام سجان وعطاياه خوف ودموع
وطلع الليل سجن...النوم على ارضه ممنوع
قولت ياليل مش عايز نجوم...خلينى بس افضل شايفها
قاللى لأ..بدل ما تموت على لمسه من شفايفها
ساعتها يا حلو ح تطلع لفوق والنهايه بقى انت عارفها
لا ارتويت م الشفايف ولا تتوب رغم ايمنات حالفها
ولا ح تحرم الفكر والسهر..والعشق والنظر
وح تتوه فى مدينه اوهام رسمت بخيالك طريقها ومشارفها
النجوم دى مرهونه لفارسها اللى فى يوم يقوم خاطفها
ومنها اللى طلع خلاص للسما
مع صياد فى مركب من دهب مجادفها
احسنلك دور على سما تانيه
فى كون تانى
يمكن تلاقى مرادك
ويمكن ترجع توجع ودانى
بأهه فى قلبك وايه بقى الدوا
الدوا تكتب فى حضنى للعشاق مووايل واغانى
وتنسى نفسك شويه وتبطل تشكى لان ماحدش سامعك
ومين عارف يمكن ف يوم تتسمع اهاتك وتطفى شمعك

انا وانتى واحد

انا وانتى واحد
والكون علينا شاهد
انا وانتى واحد
انا القلب وانتى دقاته
انا الفرح وانتى ابتساماته
قريب...بعيد....دايما سوا
ساكتنا كلام زى الهوا
انا وانتى واحد
والكون علينا شاهد
انا وانتى واحد
انا الشمس وانتى الضلايه
انا الليل وانتى القمرايه
الورد والشوق حوالينا
مين يشوفنا يسمى علينا
انا وانتى واحد
والكون علينا شاهد
انا وانتى واحد
انا البحر وانتى السمكه
انا الصياد وانتى الشبكه
يوماتى ع اللقا بنتواعد
ح نفضل لبعض ولا يمكن نتباعد
انا وانتى اوحد
والكون علينا شاهد
انا وانتى واحد
انا ورق الشجر وانتى النسمه
ح اكونلك نصيبك وانتى القسمه
من اول لحظه خلاص صدقنا
مهما تمر سنين...بتجمعنا اشواقنا
وانا وانتى واحد
والكون علينا شاهد
انا وانتى واحد
اهداء خاص جدا الى نور القمر

يا حبيبتى وداع

مفاهيم كتير مهمه فى حياتنا كل ما نكبر كل ماتكبر معانا وتحاصرنا بالحيره...زى الخيانه والوفاء والاخلاص وطبعا...الحب..والذكريات... بتكبر مشاكلها وبنمر بيها وبتخلق صراعات قويه...نهايتها معناهاحياه جديده وتاريخ ميلاد جديد
جه فارس بحصانه
عايز يخطفك وتبقى روحه وكيانه
وبقيت بعيد عنك وصعب ادام عينك تلاقينى
صعب... ماضاعت وياكى اغلى سنينى
بس لو عايزه تشوفينى
بصى فى السما على الطير الهايم الحيران
ولو عايزه تسمعينى
اسمعى موج البحر اللى علينا زعلان
ولو عايزه تكلمينى
غنى بصوتك اللى عايزه دايما فرحان
ولو عايزه تحسينى
ضمى بايديكى قلبك اللى جواه انا سهران
ولو عايزه تنسينى
بصى للشمس ساعة الغروب وهى بتدوب ...عشان ما بقاش لها فى الدنيا مكان
بتقول خلاص انتهيت...وياريت....تموت معاها الاحزان
وانا حافضل فاكرك ولاعمرى انساكى
ولا انسى لحظه دفا حسيتها فى هواكى
ولما اجى افتكرك....ح اغمض عينيا وافتح ايديا.....وابص لفوق
واشم ريحة عطرك...ولمسة ايدى على شعرك...ولا عمرى منهم افوق
وخلاص بد بله وصوره وزغروته...انتهى حلمنا
بقيتى لغيرى ماعدش ينفع الشوق يضمنا
اتحملى قسوة الايام علينا
وادعى البعد بقى ينسينا
وعيشى عمرك اللى جاى معاه
اكيد بيحبك وشايلك كتير جواه
اديله كل حاجه بحبها ولقيتها فيكى
حضنك غيرتك لمستك وضحكة عينيكى
ولو كان ليا بنوته اموره زيك....الزمن قال بيعوضنى عنك بيها
ح اسميها على اسمك...وافضل دايما شايفك فى عينيها

ومن الحب ما قتل

:ساعات كتير الحب بيتقلب لضده....وقالك ايه بقى
طير فى سما مالهاش اخر
تايه وقلبه بيدور عليه
بيرفرف بجنحاته ومش قادر
على عذابه وناره ودموع عينيه
بيصرخ وسط الريح...بيناديكى...بيترجى فيكى....داوى الام الجريح
نسى الفرح والهنا...فضل يحبك..زواتعلق بقلبك...فانكتب عليه الضنا
ح ابعد عن عيونك...وعن الدنيا...ومش انت الجانى
الجانى هو قلبى...شوقى وحبى...وسهرى فى ليل احزانى

نور القمر2

كتبت عنها قبل كده ومهما اكتب عنها مش ح ابطل....وعايز اقولها انك صديقتى الوحيده وان اى كلمه حسيتها وكتبتها قليله عليكى اوى بس معلش انتى برضه ح تستحملى...ومين غيرك بيستحملنى... وقالك ايه بقى
كل ماافكر فيكى...اتوه فى جنه
وايديا فى ايديكى...وغناوى بتتغنى
الجنه دى انا جنبك فيها...بس ليه عيونك بتخبيها
يا حلم يا همس ورق الشجر
يا موجة بحر ياسحر المطر
يا نسمة ليل...يانور القمر
زى العصفور بغنى معاه عايزك هنا جنبى
اغنى موال ياعينى ياليل واااااااااه ياقلبى
ياحلم ياهمس ورق الشجر
يا موجة بحر يا سحر المطر
يا نسمة ليل...يا نور القمر
مهما ح اقول عليكى واعيد كلامى ما يكفى
حنانك طيبتك قلبك لما لحبيبه بيوفى
يا حلم ياهمس ورق الشجر
يا موجة بحر ياسحر المطر
يا نسمة ليل...يا نور القمر
وف الاخر مش ح الاقى احسن من كلمات غناها محمد منير فى اغنيته..لما النسيم عشان اقولها
يا نجمه كل ما ضيها يلمس حجر يعلى ويتحول قمر
بكتب حروف اسمك بحبات الندى على كل اوراق الشجر
مين اللى يقدر يعشقك ادى انا
مين اللى يقدر يوصفك زى انا
يا حلم نفسى تحلمه كل القلوب
يا اعلى احساس شدنى خلانى ادوب
خلانى احس انى بشر

الحب الاول

هو مين فى الدنيا دى بينسى اول حب ليه؟؟طب ولو الحب دا لسه جواك مع انك قابلت كتييييير.......واتحبيت اكتر....لكنه لسه بقلبك ومش عارف هو كمان حاسس ولا لا...ياترى ح تعمل ايه؟؟
اخيرا كلمتها وسمعت صوتها
وقادت نارى من ضحكتها
حسيت انى فى عالم تانى ساعتها
ولقيتها ادامى فى خيالى بكل مافيها
بروحها وشعورها...مشيتهاوعينيها
ياااااااااااااه لو لسه فاكره ايامنا
زى ما انا فاكر كل كلامنا
وفاكر خوفى عليها وشوقى اليها
وفضلت بحبى حتى لما سافرت بعيد
ومين عارف اكيد شاف قلبها غيرى اكيد
المهم ان حياتى اتولدت من جديد
لما كلمتها وسمعت صوتها
وارتاح بالى واااااه من ضحكتها
حسيت انى فى عالم تانى ساعتها
ولقيتها ادامى فى خيالى بكل مافيها
بروحها وشعورها...مشيتها وعينيها
خايف يوم قلبى يقع ف الكلام ويقول
بحبك والله بحبك والليل بحبك يطول
وانك دايما فى بالى لو حتى سرحت
وفى احلامى معايا لفين ما روحت
بنادى عليكى وبحلم تسمعينى
واسمع صوتك وتشوفك عينى
وادينى خلاص ارتحت
لما كلمتها وسمعت صوتها
قادت نارى من ضحكتها
قالوا عن حب الطفوله ايام وتروح لحالها
مش عارف بقى مالى بعيونك ومالها
وليه حبك فاضل اوى الايام دى بحالها
حكيت عنك فى غناويا كتير
ورسمت قلبى جنبه قلب كبير
هو قلبك ولسه جوايا كتير
لكن سامعانى ولا بنادى على نجمه مش طايلها
نجمه مع غيرى فرحانه مهما قعدت احايلها
خلينى دلوقت ف اجمل لحظه
لما كلمتها وسمعت صوتها
وقادت نارى من ضحكتها
حسيت انى فى عالم تانى ساعتها
ولقيتها ادامى فى خيالى بكل ما فيها
بروحها وشعورها...مشيتهاوعينيها

موال اليأس والامل

طريق طويل ووحده قتاله
وعيونى ف السما ونجومها رحاله
واسأل وصلت يازمن يقولى لالا
والاحساس تايه فى غربة قلبى
ولفين واخده معاك يامراكبى
وليه الموج يلطم فيه وايه انا ذنبى
وايه ذنب الطير توقع الريح عشه...ويبات الدمع على خده
وبيت الرمل اللى بناه حبيبن...ييجى الموج ويهده
وايه ذنب اللى بيحب ودايب فى هواه
وذنب واحد زيي مش لاقى دواه
عايش حزين فى دنياه
نايم فى امان الله...يلاقى قلبه بيضرخ بردان
اقوله نام وح اجيبلك غطى فوق الغطيان
يقوللى بتضحك على نفسك ودارى بعلتى
اقوله مع انى طبيب لكنى معاك زى قلتى
وفى عز الفرح خايف اوى والكل مطمن سعيد
وفى عز ضحكتى نزلت دمعتى نارها تقيد
وع الناى اهاتى تنعزف وتسافر فى الفضا بعيد
الدوا طلع سم وكلامى بقى هم
والجرح ما اتلم والدمع صار دم
بس لأ
ح اخرج م السجن وتشوف عينى الشمس
وصوتى ح يملا الكون بعد ماكان مجرد همس
ولو طريقى نهار...سحابه ح تحن عليا
ولو طريقى ليل...قمره ح ينور خطاويا
ح اوصل للجنه اللى شايفها وراسمها فى احلامى
وحتى لو وصلت بعد ما خلصت ف الدنيا ايامى
الخلود هو مصيرنا ولو كان خلود اسامى
طمعان فيه وح الاقيه...سجل يازمان كلامى

نور القمر1

انسانه كتبت عنها اول ما عرفتهامن ع النت...وبجد كل كلمه كلمه كتبتها موجوده فيها وتستاهل اكتر منها....اعتقد مفيش كتير زيها..وهى صديقتى الوحيده...ربنا يخليها للى بيحبوها...وقالك ايه بقى
رسمتك قمر تايه وسط السحاب
بيدور على دنيا الفرح والاحباب
قمر فى قلبه كتير مخبيه...بيسأل ليه الدنيا بتجرح فيه
ساعات بيشكى وماحدش سامعه
يقول ما يهمش ويدارى ع الخد دمعه
وقلب حنين عمره ما كان قاسى
تجرحه الناس ويصبح لجرحهم ناسى
ضحكته بترن ف ودانى
وصورته عايشه ف وجدانى
نفسى بعد ما فتحلى قلبه ادخل واعيش جواه
فى ناره وفرحه اكون وياه
واديله عمرى واحلم معاه
مكانك مش ف دنيا قلوبها زى الحجر
مكانك فوق جنب النجوم...مطرح القمر
زيك زى القمر باستنى طلته عليا
وان غاب ف يوم تلعب الظنون بيا
ولما ييجى ينور سمايا ولياليا
نتكلم ونحكى واتمنى يفضل بين ايديا
مكانك مش ف دنيا قلوبها زى الحجر
مكانك فوق جنب النجوم مطرح القمر

وجع البعاد

سؤال بعيد شويه عن الموضوع....مين بيشتاق للتانى اكتر...الولد ولا البنت؟؟انا رأيى ان الولد لو راجل بمعنى الكلمه...يبقى البنت ح تشتاق اكتر...ولو كان شوقه لها مالوش حدود...شوقها ليه ح يكون فوق كل الحدود لانها من غيره ضعيفه ومحتجاله اكتر..... الكلام دا لو ايه؟؟لو راجل والرجال قليل والعيال على قفا مين يشيل ولا ايه رأيك؟ممكن اكون بقول كه عشان متعود ع التعب والشقا شويه...نرجع لموضوعنا قالوا البعد نار وقولت انا القرب نار فوق النار بس احتراما للناس الاولانيين قاللك ايه بقى
جه اليوم وكان لازم نفترق
واقفه شايفه ذكرياتى بتتسرق
وفى عيونى دموع شمعه بتتحرق
قولت نصيبى .....ابعد عن حبيبى....واعيش اداوى الجراح
دايما شايفاه....ح افضل فاكراه....ولا ح انسى اللى راح
ماشيه بكلم النجوم عليه....واحكى للبحر عن عينيه
واقول للقمر السلام امانه للحبيب
لما تشوفه قوله اللقا قريب
وان مهما حسه عنى ح يغيب
الجرح مسيره ح يطيب
وح يرجع والمس بايدى خده
وف حضنه ح ابنى اللى الزمن هده
من غيره عايشه ماليش وجود
والخوف دنيا كبيره من غير حدود
م الحزن قولت ياريتنى ما كونت انسان
انسان قلبه بيدق والحزن عليه بيبان
بس ف يوم ح يرجع والمس بايدى خده
وف حضنه ح ابنى اللى الزمن هده

كلام فى الهوى

دى مجموعة رباعيات كتبتها...قالك ايه بقى
بتحب؟وسهران تعد النجوم؟
ياخوفى ليطلع سهم الهوى مسموم
يصيب قلبك ياخويا ياصغير ويندمى
دا الهوى زى الهوا..لو مسكته تبقى موهوم
وعجبى
نصيحه... اياك تعمل الخد مداس لتنداس
اكسر عينيها تنولها من ساسها لحد الراس
اسمع كلامى ومايهمكش ضعفها ..كله تمثيل
اااااه من حوا وطبعها العجيب...فيها قسوه وفيها احساس
وعجبى
الحب بحر فيه الغريق يتعلق بقشايه
نظرة عين يبدأ طريق مش عايزله نهايه
والهمسه تستاهل ينكتب عنها الف حكايه وحكايه
واللمسه نار البردان..والحبيبه فى الليل قمرايه
وعجبى
وقالك ايه تانى....يااهل الغرام انا قلبى للبيع
قولوا اى كلام قبل ما يضيع
يا مين يشترى بكلمه او بضحكه او حتى بنظرة عين
عاشق للقمر وقابل للسهر فى ليل حبيبى سنين

موال كل يوم

سهران بفكر فى احوالى
الدنيا مالها كده ومالى
كل ما اقول الفرح بيقرب
والحزن شمس بتغرب
القى كل حلم ضاع من خيالى
وتصدمنى الحقايق
ولقيتك يا قلبى خالى
فين اللى يخاف عليا وجوا حضنه ارتاح
يمسح دموعى وبضحكه انسى اللى راح
برسمها دايما صوره فى خيالى ....وافضل يوماتى اكلمها
مش بترد عليا ساكته...وازاى بس الومها
ما هى صوره وخلاص بصبر نفسى بيها
شايفها فى كل الناس..وف وسطهم بدور عليها
برسمها بنوته بضفاير وشعرها اسمر طويل
عيونها تخطفنى وتسهرنى الليل
لابسه فستان احمر لون خدها الجميل
على راسها ورده بيضا
وغيران منها نجوم السما البعيده
ياترى ح الاقيها ف يوم ...ولا افوق بقى م الاوهام
اكسر قلبى وانسى الحب..... واتحمل وحدى مرار الايام
بس ازاى ح افضل كده وحدانى من غير حبيب
اكون فرحان بقربه واموت لو عنى ثانيه يغيب

زى اختى

ساعات كتير تقول بحب فلان دا زى اخويا بالظبط...وفلانه دى زى اختى...سواء كانوا قرايب او جيران او زمايل انما المشكله بقى ان فلانه دى بتحبك بس مش زى اخوها....مصيبه طبعا....عشان كده قالك ايه
زعلتى منى ليه لما قولت انك زى اختى
هى دى الحقيقه ما كنش ينفع عليكى اخبى
ازاى العب بمشاعرك وانا جوايا بتألم
وابص فى عينيكى واشوف شوقك بيتكلم
انا اسف كان لازم اقول اللى ف قلبى
دا انتى زى اختى
دا حبى ليكى من نوع تانى زيه ما شوفت
مش حبيب لحبيبه...حب اخ لاخت
كلامك ليا مليان امانى
الوهم حواليكى بيعذبك من تانى
اه لو كنت حسيت كده من زمان
كنت اختار كل كلمه قولتلها بحنان
انا اسف كان لازم اقول اللى ف قلبى
دا انتى زى اختى
ياغاليه عليا افهمينى
لو تأمرى اديكى عينى
بس ما حدش يعرف فين نصيبه
وامتى ح يبقى جنب حبيبه
اللى اعرفه ان حياتى مش ملكى مع ان قلبى فاضى
وصعب ف يوم احب...مش ح ابقى راضى
انى اعذب واحده معايا ليل ونهار طول المشوار
مهما كانت بتحبنى ح تمل م الانتظار والتعب والمرار
صدقينى ح تنسى حبى مع الوقت
كده قولت اللى ف ضميرى واستريحت
دا حبى ليكى من نوع تانى زيه ما شوفت
مش حب حبيب لحبيبه...حب اخ لاخت
انا اسف كان لازم اقول اللى ف قلبى
دا انتى زى اختى

الحب وسنينه

لما الحب يزيد...ما يبقاش فيه حل غير انك تفتح صدرك وتجمد قلبك وتبوح بحبك...ايه اللى حيحصل يعنى..على رأى الشاعر العظيم ...اتجرأ وخللى الشوق يتكلم..وكان ليا الحظ انى اعيش مع صاحب التجربه دى حكايته....لانه زى اخويا وكتبت عن يوم من ايام مش ح ينساها... وقاللك ايه بقى
ايام بريئه وحب كانت بدايته دقه
مشتاق بس اقولها لو حتى قالت لأ
وعلى كفى شيلت ايدى...ياقاتل يا مقتول
ح تتكلم ولا ح تخبى...تايه فكرى ومشغول
والسؤال بالف اجابه...وممكن ولا مش معقول
كلمتها وجوايا كلام يا ما
بس كانت خايفه الملامه
بس عينيها قالتها بابتسامه
اللى ف قلبك...جوايا
عايزاك هنا جنبى...ويايا
ومشيت هى ورجعت انا فرحان
يومها طاير ف السما وليلتها سهران
سألت نفسى ارتحت ولا لسه دايب حيران
عرفت ان قرب الحبيب اصعب م البعاد..والشوق زاد عليا كمان
امتى ح يبقالى الحق لما عليها اغير
ولما المس جبينها لما الشعر ع العيون يطير
ولما ف حضنى احميها ولما عشانها البحور اخطيها
بس هى تقولها بس...وقلبى يطولها وبيا تحس
نهايته..صبرت كتير وهانت شويه
يلا بقى يا حبيبى قرب ليا
composed by the well-talented:delpierooo

كلمة بحبك

المفروض اللى بيحب يقول للى بيحبه؟ولا لأ؟...ش كتير بتحصل اننا نقول الكلمه دى..بحبك....انا جربتها وايا كانت النتيجه بيقولوا لازم اللى يحب يقول وفيه بيقولك لا ما يقولش لانه بعد ما يقولها...ح يعمل ايه...عندهم حق لان فيه ازمة حب وجواز اليومين دول

لكن لنفترض ان الظروف تسمح ان اللى يحب ح يقول...قالك ايه بقى

اتجرأ وخللى الشوق والهوا يتكلم

واياك تقول اللى يحب يتألم

وليه تلعب بيها وبيك الاوهام

وتاخدها فى حضنك بس فى الاحلام

سايبها لحد ما يضيع معاها الغرام

وساعتها ح تجيب اللوم ع الايام

ح تفضل كده لا طايل سما ولا طايل ارض

عيونها بتسأل وفين وايه ح يكون الرد

بايديك مش بايدها تريح قلبين

لو ليلك نار ليها بيعدى سنين

اهرب منها..بس ح تروح على فين

دا صورتها دايما ع البال وقصاد العين

اتجرأ وخللى الشوق والهوا يتكلم

واياك تقول اللى يحب بيتألم

خايف من يوم .....الوداع فيه

اصعب م الندم والاه وياريت وكان ليه

وتقول مع الايام ح انسى وحزنك تداريه

وازاى تنسى ومين ينسى وحبيبه ادام عينيه

وعجبى

من صغرى حبيت الرباعيات اوى واتأثرت..وحفظت اغلب رباعيات صلاح جاهين..اسطوره الكلمه العاميه وبعد ما كبرت ومشيت

فى الدنيا والدنيا مشيت عليا عرفت اهميه الكلمه لما بتوصف الحال
واخترت اربع رباعيات لصلاح جاهين كل واحده منهاوصف دقيق جدا لفتره من حياتى واحداث مريت بيها وحاجه جوايا
انا شاب ولكن عمرى الف عام
وحيد وكلن بين ضلوعى زحام
خايف لكن خوفى منى انا
اخرس ولكن قلبى مليان كلام
وعجبى
رقبة ازازه وقلبى فيها انحشر
شربت كاس واتنين وخامس عشر
صاحبت ناس م الخمره ترجع وحوش
وصاحبت ناس م الخمره ترجع بشر
وعجبى
كيف شوفت قلبى والنبى ياطبيب
همد ومات ولا لسه سامع له دبيب
قاللى لقيته مختنق بالدمع
ودواه لمسه من ايد حبيب
وعجبى
يا باب يامقفول..امتى الدخول
صبرت ياما واللى يصبر ينول
دقيت سنين والرد يرجع لى مين؟
ماهو لو كنت اعرف مين انا كنت اقول
وعجبى
وعجبى فعلا ع الدنيا وحال الناس وعجبى ع الكلمه لما توصف احساس وعجبى على زمن العدل فيه ماشى ع الراس

الصفحه الاولى

ياعندليب ما تخافش من غنوتك
قول شكوتك واحكى على بلوتك
الغنوه مش ح تموتك انما
كتم الغنا هو اللى ح يموتك
وعجبى
عندما يمتلىء القلب بالمشاعر والكلام ويعجز اللسان عن نطقها وتعجز الاذان عن سماعها...يصرخ...دون قيود وعندما يرد ان يغنى سعيدا كان او حزينا يغنى باعلى صوت..دون قيود لذا كتبت وكتبت من قلبى دون الرجوع للعقل اللذى يفرض قيوده دائما وان كانت مفيده وان كان العقل هو الناصح الامين الا اننى ارفض القيود فكتبت دون قيود

اتذكر عندما امسكت بورقه وقلم وانا صغير كتبت قصه عن الظلم فى صفحه كراسه كان اسمها ذهب مع الريح لانى كنت ا سمع الاسم كثيرا...كنت متأثرا بظلم حدث لنا...لاحاجة لان اذكره ومع الايام كبرت معى العواطف والاحاسيس والاراء والانفعالات والانطباعات واصبح القلم صديقا لى...اشعر وكانى اكتب فى صفحات التاريخ على ضوء القمر

اهدى كل حرف فى كل كلمه الى من كان سببا فيها ....الى من احبهم لدرجة الجنون...اللى من يحبوننى ويهتمون لامرى

واهداء من الاعماق الى نور القمر..توأمى الذى يعيش بعيدا عنى