تاج اتبعتلى من نوران...متشكر يانورانا
هل كنت طالب شاطر ف المدرسة؟
الحمدلله كنت شاطر...الحكايه بدأت انى مادخلتش حضانه من اصله..ووالدتى هى صاحبة الفضل انها علمتنى كتير اوى لدرجة انى لما دخلت اولى ابتدائى كنت اشطر من بتوع تانيه...هههههه اه والله
افتكر موقف فى اولى فى حصة الدين..كنت دايما باجى حافظ كويس والعيال تنضرب عشان مش حافظه...جيت ف مره وقولت انا زهقت وعايز اجرب كدا اقول لا مش حافظ...اصل انا دايما كدا لازم اعمل الغلط عشان اعرف الفرق بينه وبين الصح..مش بقتنع غير لما اعمل الغلط وافرق بينهم بنفسى....المهم يعنى انضربت...والبنتين اللى كانوا قاعدين جنبى زعلوا منى وماجوش يومها يذاكروا معايا.....طبعا نمت وانا بعيط..ومن ساعتها حرمت
على فكره كنت الوحيد اللى بيقعد جنبى بنات ف الفصل..مش عارف ليه؟
وبعد كدا كنت دايما الاول والحمدلله مع بنت اموره جدا كنا بنبدل مع بعض وسبحان الله دخلت
طب تانى وبعدين حولت معايا نفس الكليه. والغريبه نفس اللى بيحصلها بيحصلى برضه..نجحت تنجح سقطت تسقط...ياااااااااااااااااللقدر...(::
من ساعة بقى مادخلت الكليه ماشوفتش نجاح انما والله العظيم انا بحاول اكون دكتور فاهم اكتر ماكون دكتور حافظ بس...او حتى ابراهيم ولا محسن...هى هى هى هى هى
حلوه !!!!حلوه!!!حلوووووووووووووه
كنت عايز تبقى ايه وانت صغير؟
شاعر عاميه زى صلاح جاهين..بجد والله . انا بقرأ من صغرى شعر ومن ابتدائى كمان وكنت بحب صلاح جاهين جدا جدا جدا ولسه طبعا وكتبت قصه وانا ف رابعه واخدت جايزه ووالدتى هى اللى ادتنى الجايزه اصلها كانت عندى ف المدرسه..ههههههه ايواااااااااان كوسه يعنى.... سامعك ياللى هناك.. وكنت عايز ابقى ظابط شرطه ودكتور وعالم فضاء....كنت بموت فى الفضاء وبجيب من المكتبه دايما كتب جيولوجيا اتفرج على صور الفضاء..وكتب زرزور دا ولا اسمه بوزو ..مش فاكر
ودكتور زى كل العيال الصغيره ما بتقول
ايه اكتر مادة بتكرها؟
الحمد لله يعنى..كنت بكره كل المواد...كنت بروح المدرسه بس عشان...احم احم اصحابى يعنى..وعمرى ماحبيت ماده بعينها..كنت بكره جدا كل حاجه متعلقه بالدراسه بس كنت بذاكر عشان الموقف اللى حكيته من شويه..اعوذ بالله كنت بكره السطور والاقلام والاساتيك وعندى عقده من المنقله وعندى فوبيا من المساطر...وبخاف من البراجل..وكراسة الرسم البيانى...يييييييع..اعوذ بالله دا احنا كنا بنتبهدل ف المدارس...ايوه معاك ياللى هناك انت... ان الكليه برضه بهدله بس على الاقل ماشى بمزاجك وحر كدا ياخى...عايز تدخل المشرحه لا مش عايز...عايز تذاكر وتنجح ؟لا والله انا عايز اسقط السنه دى...وعيش مع موووووودك يامعلم
ايه الهواية اللي لما تكون فيها بتنفضل عن العالم الخارجي؟
كنت بعمل كوره من الورق لكبيره والعب بيها لوحدى -اصل اتربيت لوحدى بعد اخويا واختى ما اتجوزوا-وافضل العب بقى ولو مصر اتغلبت كالعاده لازم كنت اخليها تفوز وانا بلعب واتخيل مجدى طلبه الله يمسيه بالخير بيجيب الجون اللى ضيعه ...الله يسامحه..الكوره جياله ع الارض...وحضرته نازلها بدماغه عايز يجيبها بدماغه....طلبت معاه يجيبها بدماغه ...حيل الله لازم اجيبها بدماغى ويقولوله ياعم لا..يقول مفيش ياعم انا ح اجيبها بدماغى وطبعا هو اللى دخل الجون والكوره ومصر خرجت بره الدنيا كلها.... وماراحتش مصر كاس 94...دا انا يوم ماتش زيمبابوى عيطت عيااااااااااااط. ومن ساعتها ما شجعتش المنتخب تقريبا غير بقى فى 2006..بس ربنا يخليهولنا الاهلى دايما مظبطنى كدا ورافع راسى..اهلااااااااااااااااااااااااااااااااااااوى
المهم وطبعا الكتابه هى اكتر حاجه ممكن تخلينى انفصل عن العالم بس مابقتش اكتب زى الاول خاااااااااااااااالص بقيت اقعد مع نفسى وخلاص والقرايه والكمبيوتر
فى النهايه ح اعمل للتاج ثرو لوب من فوق المدافعين ل...الساحر....جهينه...وعد العيون...دودى
Subscribe to:
Post Comments (Atom)
4 comments:
غلطت عمرك
اهلاويييي
نهارك مش طالعله شموسه ابدا
اهلاوي
تصدق عيب كدا
بجد عيب
كمان مره عيب
ومش خايف تقولها
عموما هنري ميشيل جهه الحمد لله وهناخد وضعنا تاني
استعدوا
نرجع بقي للتاج
كلنا واحنا صغيريين
كنا بنفكر بنفس الطريقه
بس ايه يا معلم حكايه البنات الي كانت بتقعد جنبك دي
من صغرك
ماشي يا سيدي
ربنا يسهلك
انا بهزر اوع تكون بتزعل
اخر حاجه بقي
راجع نفسك كويس في مسأله الانتماء الكروي دا
الحق نفسك انا قلبي عليك
تحياتي
سبحان الله؟ انتى جايه اليومين دول بالذات وتقولى راجع نفسك فى انتمائك...انا افتكرتكوا انقرضتوا
وميشيل مين اللى ح يقدر يعمل حاجه...دا من ساعة ماجه والدنيا باظت اكتر...كفايه انه اتغلب من البوابين....عموما كفايه اننا الناهرده شوفى بنلاعب مين وانتوا بتدوروا عن لعيبه اصلا...انا زعلت عشانك والله...ليه تعملى ف نفسك كدا...عموما لسه عندك وقت تفكرى لحد ماتش الاهلى والزمالك الجاى.. ومش عارف اطول عليكى عشان ما تزعليش من كلامى....ميرسى على الكومينت بتاعك وانا نسيت ابعت التاج دا للناس بس انا بعتهولك
ايه السرعة فالاداء ديه جاوبت بسرعة ع التاج فيه حد ميذاكرش علشان يشوف ايه اللي هيحصل ماشاء الله :)
بس كويس انك عارف ان احسن تبقى دكتور فاهم مش حافظ زيي بحاول ابقى بشمهندسة من غير دروس وكورسات وفاهمة بس المحاولات باءت بالفشل لاني يئست خلااص مش موضوعنا المهم ايون كوسة ههههه يعني افهم من كده انك بتكره الرياضة المساطر والمنقلة والبراجل ليه يا عم ده الرياضة مفيش اسهل منها حتى اسالني انا هههههههه
ومين مجدي طلبة ده اللي جاب درجة جزاء ف ماتش هولندا ومصر ف كاس العالم 90ولا ده واحد تاني؟؟
ايوووووووه اهلي اهلي هوه هوه باستثناء نتيجة النهاردة جاب ضاد ف المااتش ههههههه
شوفتى انا اول واحد تقريبا يعمل التاج بعدك
قوليلى بقى محاولات ايه اللى بائت بالفشل...انتى فى سنه كام يا بشمهندسه؟اعدادى دى رعب ف كل الكليات سواء صيدله ولا حتى لما كانت فى طب....بعدها المواد والدنيا بتبتدى تصفى كدا والمواد تبان
بكره ح تشوفى وح تبقى احسن بشمهدنز بالزين فيكى يا مصر
مجدى طلبه دا بجد كان احسن وينج شمال فى الاهلى و مصر كان بيجيب يا نوران اجوان من الكورنر والله العظيم كان اسطوره بس هو بييجى فى الهايفه ويهيس...التانى مجدى عبد الغنى اللى هارينا بضربة الجزاء بتاع 90...لدرجة اننا كرهنا اليوم دا
Post a Comment